O‘zbekiston Superligasining 13-turidan o‘rin olgan bahsda Namanganning “Navbahor” jamoasi o‘z maydonida “OKMK”ni qabul qildi.
Joriy mavsumda har ikki jamoa yaxshi natijalar qayd etayotgani, turnir jadvalida ham deyarli qo‘shni bo‘lgani bois mazkur o‘yin ushbu turning markaziy bellashuvi maqomida edi. Shuning uchun mazkur uchrashuvga eʼtibor mutaxassis va muxlislar tomonidan yuqori bo‘ldi.
Ilk daqiqalardan tashabbusni o‘z qo‘liga olishga intilgan mezbonlar tezkor gol urdi. Alisher Odilovning chap qanotdan raqib jarima maydonchasi ichiga oshirgan to‘pini Zabihillo O‘rinboyev darvozaga joylab, hisobni ochdi – 1:0.
Bellashuvning 35-daqiqasida “lochinlar” standart vaziyatdan so‘ng hisobdagi farqni oshirdi. Braziliyalik himoyachi Gilyerme Gedesh vaziyatdan unumli foydalanib, “Navbahor” tanaffusga 2:0 hisobidagi ustunlik bilan chiqib ketishini taʼminladi.
Uchrashuvning asosiy vaqtiga hakam tomonidan qo‘shib berilgan daqiqalar davom etayotgan paytda zaxiradan maydonga tushirilgan braziliyalik hujumchi Augusto Pedro gol urib, yakuniy hisobning yirik – 3:0 ko‘rinish olishini taʼminladi.
“Navbahor” ushbu g‘alabadan so‘ng ochkolari soni 23 taga yetkazib, turnir jadvalida 5-o‘rinni egallab oldi.
“Daryo” “Navbahor” va “OKMK” o‘rtasidagi o‘yindan fotogalereya tayyorladi.
Fotolar muallifi Oqilxon Mamajonov.
