Kambodja Tailandning meva va sabzavotlar importini, shuningdek seriallarini taqiqladi. Bu haqda The Guardian xabar berdi.
Bu taqiq janubi-sharqiy Osiyodagi qo‘shnilar o‘rtasidagi uzoq davom etgan chegara mojarosi tufayli yuzaga kelgani aytilmoqda. May oyida qo‘shinlar chegaradagi bahsli hududda qisqa muddatli otishma uyushtirib, Kambodja askarlari o‘ldirilganida keskinlik avj olgan edi.
Tailand so‘nggi kunlarda Kambodja bilan chegarada cheklovlar joriy qilgan. Kambodja esa Tailand filmlarini televideniye va kinoteatrlarda ko‘rishni taqiqlagan, chegara nazorat punktini yopib, Tailanddan internet o‘tkazuvchanligini qisqartirgan. Har ikki davlat bir-birining fuqarolari uchun tashrif buyuruvchilarning viza muddatini qisqartirgan.
17-iyun kunidan Kambodja Tailand meva va sabzavotlari taqiqini kuchga kiritgan. Bunga 2023-yilda o‘g‘liga topshirgunga qadar mamlakatni qariyb 40 yil boshqargan Kambodjaning sobiq rahbari Xun Senning ultimatumi sabab bo‘lgan.
Bayroqlar va mamlakat yetakchilarining suratlarini ko‘targan o‘n minglab kambodjaliklar 18-iyun kuni hukumat pozitsiyasini qo‘llab-quvvatlash uchun rasmiy miting o‘tkazishga Pnompen ko‘chalariga chiqqan.
Kambodja Xalqaro suddan chegara mojarosini hal qilishni so‘ragandi. Biroq Tailand sudning yurisdiksiyasini qabul qilmasdan, masalani to‘g‘ridan-to‘g‘ri muzokaralar yo‘li bilan hal qilishga undagandi.
Uzoq davom etgan nizo, 1953-yilgacha Kambodjani egallab turgan Fransiya birinchi marta quruqlik chegarasini xaritaga tushirgan paytga to‘g‘ri keladi. 2003-yilda tailandlik mashhur inson Kambodjaning Jahon merosi ro‘yxatiga kiritilgan Angkor Vat ibodatxonasi yurisdiksiyasini shubha ostiga olgandan so‘ng, isyonchilar Pnompen shahridagi Tailand elchixonasi va Tailand biznesini yoqib yuborgandi.
