Madridning “Real” klubi tarkibida penalti ijrochilarini tanlash borasida hali ham aniq qarorga kelingani yo‘q. La Liganing 30-turida Vinisius Junior 11 metrlik jarimani aniq amalga oshira olmay, jamoasining “Valensiya”ga mag‘lub bo‘lishiga sababchi bo‘ldi.
Marca nashrining xabariga ko‘ra, bosh murabbiy Karlo Anchelotti jamoaning asosiy penalti ijrochisini tanlab oldi. Agar jamoa Chempionlar Ligasi doirasida “Arsenal”ga qarshi bahsda penalti qo‘lga kiritsa, birinchi bo‘lib zarbani Kilian Mbappe ijro etishi rejalashtirilgan. Agar u muvaffaqiyatsizlikka uchrasa, keyingi navbat Jud Bellingemga beriladi.
“Real” va “Arsenal” o‘rtasidagi ilk chorak final bahsi 8-aprel, seshanba kuni Londonda bo‘lib o‘tadi. Javob uchrashuvi esa 16-aprel kuni Madridda o‘tkaziladi.
Eslatib o‘tamiz, madridliklar 30-turdan keyin La Liga turnir jadvalida 63-ochko bilan 2-o‘rinda ketmoqda. Ularning asosiy raqobatchisi “Barselona” 67 ochko qo‘lga kiritgan holda jadvalda yetakchilik qilmoqda.
