“Tashabbusli byudjet”ning 2025-yilgi 1-mavsumi yakunlariga ko‘ra g‘olib bo‘la olmagan 33 ta loyiha uchun qo‘shimcha mablag‘ ajratildi, deb xabar bermoqda Iqtisodiyot va moliya vazirligi matbuot xizmati.
Qayd etilishicha, xalq deputatlari tuman (shahar) kengashlari tomonidan g‘olib bo‘lmagan navbatdagi loyihalarni moliyalashtirish uchun mahalliy byudjetning qo‘shimcha mablag‘lari hisobidan 7,5 milliard so‘m ajratilib, 33 ta loyiha qo‘shimcha ravishda g‘olib deb topildi.
Amaldagi tartibga ko‘ra, xalq deputatlari tuman (shahar) kengashlariga mahalliy byudjetning qo‘shimcha mablag‘lari hisobidan qo‘shimcha tarzda g‘olib loyihalarni e’lon qilish vakolati berilgan.
G‘olib loyihalar ro‘yxati bilan quyidagi havola orqali tanishish mumkin.
“Tashabbusli byudjet” jarayonining 2025-yilning 1-mavsumi uchun ovoz berish yakunlariga ko‘ra, 3,2 trillion so‘mlik 2 369 ta loyiha g‘olib deb topilgandi.
Loyihalarning
- 964 tasini — ichki yo‘llarni ta’mirlash bilan bog‘liq tadbirlar (1396 mlrd so‘mlik);
- 699 tasini — maktablarni ta’mirlash va moddiy-texnika bazasini rivojlantirish tadbirlari (875 mlrd so‘mlik);
- 247 tasini — sog‘liqni saqlash muassasalarini ta’mirlash va moddiy-texnika bazasini rivojlantirish tadbirlari (329 mlrd so‘mlik);
- 60 tasini — bog‘chalarni ta’mirlash va va moddiy-texnika bazasini rivojlantirish tadbirlari (72 mlrd so‘mlik);
- 44 tasini — ko‘cha chiroqlarini o‘rnatish yoki ta’mirlash tadbirlari (52 mlrd so‘m);
- 34 tasini — ichimlik suvi va oqova tizimini yaxshilash bilan bog‘liq tadbirlar (49 mlrd so‘m);
- 321 tasini — boshqa tadbirlar (415 mlrd so‘mlik) tashkil etdi.
Jarayonlarda mamlakat bo‘ylab jami 10 million 450 mingta ovoz berildi.
Izoh (0)