Taniqli futbol skauti Jank Chetin Manchester Evening News nashriga bergan intervyusida O‘zbekiston terma jamoasi va “Manchester Siti” klubi himoyachisi Abduqodir Husanovning o‘yinlarini yuqori baholadi.
U 2023-yilda Argentinada bo‘lib o‘tgan U-20 Jahon chempionatida futbolchi yuqori darajada o‘ynagani haqida o‘z fikrlarini bildirdi.
U turnirda o‘tkazgan to‘rt o‘yinda ham havodagi kurashlarda raqiblariga hech qanday imkoniyat qoldirmadi. U jismoniy kuchidan tashqari, juda tezkor va harakatchan futbolchi hisoblanadi.
Chetin Husanovning Isroilga qarshi 1/8 final uchrashuvidagi o‘yinini ham alohida ta’kidladi:
Husanov Isroilga qarshi bahsda o‘yinni o‘qish, to‘g‘ri joylashish, to‘pni olib qo‘yish va birga bir vaziyatlarda himoyalanish bo‘yicha yuqori darajada ekanini ko‘rsatdi. U Anan Halili va Taya Abeda kabi jismonan va texnik jihatdan kuchli hujumchilarga qarshi muvaffaqiyatli harakat qildi.
Skaut Abduqodir Husanovning kelajagi haqida gapirar ekan, uning Pep Gvardiola qo‘l ostida yanada yuqori darajali futbolchiga aylanishi mumkinligini ta’kidladi:
U vaqt o‘tishi bilan til bilan bog‘liq muammoni yengib o‘tadi va “Manchester Siti” tarkibidagi eng muhim futbolchiga aylanadi.
Shuningdek, Jank Chetin Markaziy Osiyo futbolining tez rivojlanayotganini ta’kidlab, bu hududni futbol bozoridagi yangi raqobatdosh hudud deb atadi. Uning fikricha, Abduqodir Husanov kabi futbolchilar tufayli ushbu qiziqish keskin oshib bormoqda.
