1969-yilda SSSRda suratga olingan “Brilliant qo‘l” filmi sovet kinematografiyasining eng yaxshi komediyalaridan biri hisoblanadi va hanuzgacha tomoshabinlar orasida juda mashhur. Yosh-u qari tomoshabinlar ushbu shedevr kartinani hali ham qayta-qayta tomosha qilishdan zavqlanadi. Biroq filmda ko‘pchilik e’tibor qaratmagan bitta kulgili xatolik bor. Ehtimol, aynan xatoligi tufayli ham film yanada kulgili chiqqan.
Gap Gorbunkovning o‘z manzilini taksi haydovchisiga qanday aytgani haqida. O‘sha epizodda aktyor Morskaya 21, 9-xonadon, uchinchi kirish yo‘lagi, uchinchi qavat, deydi. Bu manzil ko‘pchilikda hech qanday savol tug‘dirmagan. Ammo mantiqan o‘ylab qaralsa, to‘qqizinchi sonli xonadon uchinchi qavatning uchinchi podyezdida joylashgan bo‘lishi mumkin emas.
Agar uy faqat uch qavatdan iborat bo‘lsa va har bir qavatda faqat bitta xonadon joylashgan bo‘lsa, u holda manzil to‘g‘ri kelishi mumkin. Ammo filmda har bir qavatda 3-4 ta xonadon joylashgan odatiy besh qavatli bino tasvirlanadi.
Ssenariyga ko‘ra, aslida Nikulin “birinchi podyezd, uchinchi qavat” deb aytishi kerak edi va bunday manzil mantiqan to‘g‘ri bo‘lar edi. Komediyadagi mazkur sahna shunchaki e’tibordan chetda qolgan, deb o‘ylashimiz mumkin, ammo xatolikni Gayday darhol payqagan va ushbu sahna bir necha marta qayta suratga olingan. Ammo eng yaxshi dubl aynan manzil xato aytilgan dubl bo‘ladi va rejissyor holatni o‘zgarishlarsiz qoldirishga qaror qiladi.
Izoh (0)