O‘zbekiston terma jamoa a’zosi va Eronning “Persepolis” klubi futbolchisi Oston O‘runov mashg‘ulotlarga qaytdi.
Klub kecha o‘z Instagram sahifasiga yuklagan rasmda Oston mashg‘ulotlarda ishtirok etayotgani tasvirlangan.
Yarim himoyachi 21-yanvar kuni Eron chempionati doirasidagi “Zobahan”ga qarshi bahsda jarohat olib maydonni tark etgan edi. Uchrashuvdan keyingi tekshiruvda O‘runovning jarohati ancha jiddiyligi va u kamida 5 haftani o‘tkazib yuborishi aytilgandi.
Shundan keyin Oston “Persepolis”ning 7 ta bahsida qatnasha olmadi. Tehron klubi keyingi uchrashuvni 7-mart kuni safarda “Chadormalu”ga qarshi o‘tkazadi. O‘runov esa katta ehtimol bilan zahiradan maydonga tushadi.
O‘zbekiston terma jamoasi mart oyida Jahon chempionati saralashi doirasida Toshkentda Qirg‘iz Respublikasi va safarda Eronga qarshi maydonga tushadi.
Milliy jamoa a’zosi Oston O‘runov esa mazkur bahslargacha o‘z formasini tiklab oladi va katta ehtimol bilan uchrashuvlarda maydonga tushadi.
