36 yoshli rossiyalik aralash jang san’atlari jangchisi, UFC’ning yengil vazn bo‘yicha sobiq chempioni Habib Nurmagomedov American Airlines aviakompaniyasi reysidan tushirib yuborildi.
Hodisa guvohlari tomonidan qayd etilgan ma’lumotlarga ko‘ra, Habib samolyotda favqulodda chiqish joyi yonida o‘tirgan. Styuardessa protokolga muvofiq undan favqulodda vaziyatda yo‘lovchilarga yordam bera olishini so‘ragan. Ammo Habib styuardessaning gapini tushunmay, qisqa tortishuv yuzaga kelgan va undan boshqa joyga o‘tirishni so‘ragan. Bu holat sobiq chempionning noroziligiga sabab bo‘lgan.
Styuardessa: “Favqulodda chiqish joyi yonida o‘tirishingiz mumkin emas, aks holda samolyotni tark etishingizga to‘g‘ri keladi”, deganida, Habib: “Bu adolatsizlik”, deb javob bergan. U ro‘yxatdan o‘tish jarayonida ekipaj talablari bo‘yicha barcha qoidalarga rioya qilganini qo‘shimcha qilgan. “Ro‘yxatdan o‘tayotganimda ingliz tilini bilasizmi, deb so‘rashdi, men esa ‘ha’ deb javob berdim. Endi nega bunday qilyapsizlar?” deya norozilik bildirgan.
Shundan so‘ng, Habib ekipaj bilan bahslashib, do‘stlari bilan samolyotni tark etgan.
A video of retired UFC star Khabib Nurmagomedov being escorted off an Alaska Airlines flight has gone viral.
— Al Jazeera English (@AJEnglish) January 12, 2025
It appears staff reported feeling 'uncomfortable' with his apparent grasp of English as he sat in an exit row seat where he would need to assist in an emergency. pic.twitter.com/Bf7S7jLji6
Habib ushbu holat bo‘yicha tushuntirish berdi.
“Menga savollar bilan murojaat qilgan ayol boshidanoq juda qo‘pol muomala qildi. Men ingliz tilida yaxshi gapira olishim va hamma narsani tushunishimga qaramay, u meni o‘rnimdan turib ketishim kerakligini aytdi. U buni qaysi asosga ko‘ra qildi – irqiy, milliy yoki boshqa sababmi – aniq ayta olmayman.
Qisqa suhbatdan so‘ng, u qo‘riqchilarni chaqirdi va meni samolyotdan tushirishdi. 1,5 soatdan keyin boshqa samolyotga o‘tirib, kerakli manzilga uchib ketdim. O‘sha vaziyatda xotirjam bo‘lish va provokatsiyaga berilmaslik uchun qo‘limdan kelganini qildim. O‘ylaymanki, odamlar samimiyroq bo‘lishlari kerak”, deb yozgan Nurmagomedov o‘zining ijtimoiy tarmoqdagi sahifasida.
Taxminlarga ko‘ra, Habib UFC 311 turniri uchun Las-Vegasdan San-Fransiskoga uchayotgan bo‘lgan. Ushbu turnir kelasi dam olish kunlari, 19-yanvar kuni bo‘lib o‘tadi. Uning asosiy jangida yengil vazn chempioni Islom Maxachev Arman Sarukyan bilan revansh jangi o‘tkazadi. Yana bir muhim bahsda Habibning ukasi Umar Nurmagomedov eng yengil vazn chempioni Merab Dvalishvili bilan to‘qnashadi. Islom va Umar turnirga tayyorgarlik jarayonida Habib bilan birga bo‘lgan.
Izoh (0)