Buxoroda kripto-aktivlar aylanmasi sohasidagi qonunchilikni buzgani uchun 17 yoshli o‘smirga jinoyat ishi qo‘zg‘atilgandi. Rasul Kusherbayevning ma’lum qilishicha, ushbu jinoyat ishi tergovchining qaroriga ko‘ra harakatdan tugatildi.
Unga nisbatan Jinoyat kodeksining 278-8-moddasi (kripto-aktivlar aylanmasi sohasidagi qonunchilikni buzish) 3-qismi “a” bandi bilan jinoyat ishi qo‘zg‘atilgandi. IIV axborot xizmati rahbari Shohrux G‘iyosov jinoyat ishida gumonlanayotgan 17 yoshli Z.M. 7 oy davomida “Binans” platformasida 4 mingdan ortiq 34 milliard so‘mlik shubhali vositachilik operatsiyalarini amalga oshirib, vositachilik haqi undirib kelganini ma’lum qilgandi va buni virtual “valyutchik”lik deb atagandi.
Tergovchining qarorida keltirilishicha, Z.M. unga qo‘yilgan ayblov tugatilishida qilgan ishi ijtimoiy xavfli emasligi, aybiga to‘liq iqrorligi va pushaymonligi, oilaviy ahvoli va hokazolar inobatga olingan.
“Jinoyat protsessual kodeksining 84-moddasi 5-qismi, 2-bandiga asosan ijtimoiy xavfi katta bo‘lmagan yoki uncha og‘ir bo‘lmagan jinoyatni birinchi marta sodir etgan shaxs, aybini bo‘yniga olish to‘g‘risida arz qilgan, chin ko‘ngildan pushaymon bo‘lgan, jinoyat ochilishiga faol yordam bergani sababli uning aybliligi haqidagi masalani hal qilmasdan turib, harakatdan tugatilsin”, deyiladi qarorda.
“Aslida, tergovchilarda mana shunday vakolat ham bor. Hammani ham sudgacha sudrab javobgar qilish shartmas”, deb yozdi Rasul Kusherbayev.
Jinoyat ishi harakatdan tugatilishi bilan birga, unga 14-dekabr kuni e’lon qilingan ayblov olib tashlandi va shu kuni unga qo‘llangan shaxsiy kafillik ehtiyot chorasi bekor qilindi.
Izoh (0)