Isroil armiyasi falastinliklar boshpana sifatida foydalanayotgan Beyt-Hanun hududidagi “Halil Uvayda” maktabiga hujum qildi. Oqibatda 15 kishi halok bo‘ldi, ko‘pchilik jarohatlandi. Bu haqda Al Jazeera xabar berdi.
Xabarga ko‘ra, Isroil harbiy tanklar bilan hujumni amalga oshirgan. Maktab atrofida harbiy amaliyotlar davom etayotgani aytilmoqda.
“Ularning (falastinliklarning) boradigan joyi yo‘q, chunki Isroil harbiy kuchlari hududni tanklar va zirhli mashinalar bilan o‘rab olib, maktabga og‘ir artilleriya bilan zarba bermoqda”, dedi Al Jazeera muxbiri Hani Mahmud.
Guvohlarga ko‘ra, maktabga hujum paytida ko‘pchilik “og‘ir tan jarohati” olgan. Qurbonlar orasida to‘rt kishilik oila, jumladan, ikki nafar bola ham bor. Ular boshpana sifatida foydalanayotgan sinfxona artilleriya o‘qidan “to‘g‘ridan to‘g‘ri zarba” olgan.
“Jarohatlanganlarning ko‘pchiligi maktab hovlisida va boshqa sinfxonalarda yotibdi. Ular hech qanday davolanish muolajasi ololmayapti, chunki Beyt-Hanundagi hech qaysi shifoxona ishlamayapti”, dedi muxbir.
U maktabga bostirib kirish oldindan ogohlantirishsiz sodir bo‘lganini ta’kidladi.
