Pokiston janubi-g‘arbidagi Balujiston viloyati Kvetta temiryo‘l vokzali yaqinida portlash sodir bo‘ldi. Oqibatda kamida 20 kishi halok bo‘ldi, 30 ga yaqin inson yaralandi.
Bu haqda Geo News telekanali xabar berdi.
Maʼlumotlarga ko‘ra, portlash vokzal kassasida poyezd perronga yetib kelishidan oldin sodir bo‘lgan.
“O‘sha paytda bekatda ko‘plab odamlar to‘planganini hisobga olsak, qurbonlar soni ortishi ehtimoli yuqori”, deb ta’kidlaydi telekanal.
Politsiya va qutqaruvchilar zudlik bilan portlash joyiga yetib borgan. Kvetta kasalxonasida favqulodda holat e’lon qilinib, qo‘shimcha shifokorlar va yordamchi xodimlar jalb etilgan.
Qayd etilishicha, poyezd Peshovarga ertalab soat 9 da jo‘nab ketishi kerak bo‘lgan.
