Toshkentda foizga pul berib, qarzdorlarning uy-joylarini tortib olish bilan shug‘ullanganlikda gumonlanib uch kishi qamoqqa olindi. Bu haqda poytaxt IIBB matbuot xizmati xabar berdi.
Tergov boshqarmasi tomonidan Jinoyat kodeksining 168-moddasi (firibgarlik) bilan tergov qilinayotgan jinoyat ishi doirasida aniqlanishicha, 1989-yilda tug‘ilgan Rominov Sardor Farxodovich, 1990-yilda tug‘ilgan Yuldashev Baxtiyor Xabibulla o‘g‘li, 1993-yilda tug‘ilgan Xusainov Timur Rustamovich bir qator jinoyatlar sodir etganlikda gumon qilinmoqda.
Jumladan, ushbu shaxslar fuqarolarga foiz evaziga pul berib, qarz olgan shaxsning nomida bo‘lgan turar joy va boshqa ko‘chmas mulklarini garov evaziga o‘zining nomiga rasmiylashtirib olgan.
Fuqarolar belgilangan muddatda qarz va foizlarini bermagan taqdirda, uy-joydan oilasi bilan chiqarib yuborish va mulkini tortib olish bilan shug‘ullanib kelgan. Vaholanki, garovga qo‘yilgan mulk miqdori foiz evaziga berilgan pul mablag‘idan 3-4 barobar ko‘p bo‘lgan.
Shuningdek, fuqaro bilan qarz yoki oldi-sotdi shartnomasi tuzilganidan so‘ng kelishilgan summadan kam miqdorda pul bergan. Xususan, fuqaro ulardan 100 ming AQSH dollarini foiz evaziga so‘rasa, oldi-sotdi yoki qarz shartnomasi rasmiylashtirib bo‘lganidan so‘ng 65-70 ming AQSH dollari atrofida pullarni berib, qolgan pullarni maklerlik xizmati, boshqa xarajatlar uchun olib qolganini aytadi, keyinchalik foiz to‘lovlarni kamaytirib berishi hamda to‘lovlar kechiksa, bezovta qilmasligi haqida aytib, aldagan.
Tergov jarayonida 1989-yilda tug‘ilgan Rominov Sardor Farxodovich, 1990-yilda tug‘ilgan Yuldashev Baxtiyor Xabibulla o‘g‘li va 1993-yilda tug‘ilgan Xusainov Timur Rustamovich jinoyat sodir etganlikda gumonlanib ushlangan. Ularga nisbatan qamoqqa olish tarzidagi ehtiyot chorasi qo‘llangan.
“Hurmatli fuqarolar, agar siz ushbu shaxslardan jabr ko‘rgan bo‘lsangiz yoki ushbu shaxslarning jinoiy xatti-harakatlari bo‘yicha biror maʼlumotga ega bo‘lsangiz, Toshkent shahar IIBBning 71-206-40-97 yoki 102 raqamlariga yoxud 90-976-28-21 Telegram raqamiga murojaat qilishingizni so‘raymiz. Murojaatchining shaxsi sir saqlanishi kafolatlanadi”, deyiladi xabarda.
Fevral oyi boshlarida foiz evaziga pul berib, qarzdorlarning uy-joylarini tortib olish bilan shug‘ullanganlikda gumonlanib 31 yoshli Toxirjon Abdumalikov qo‘lga olingandi. U ham fuqarolarga foiz evaziga pul berib, qarz olgan shaxsning nomida bo‘lgan turar joy va transport vositalarini garov evaziga o‘zining nomiga rasmiylashtirib olgan. Fuqarolar belgilangan muddatda qarz va foizlarini bermagan taqdirda uy-joydan oilasi bilan chiqarib yuborish va transport vositasini tortib olish bilan shug‘ullanib kelgan. Garovga qo‘yilgan mulk miqdori foiz evaziga berilgan pul mablag‘idan 3-4 barobar ko‘p bo‘lgan.
Izoh (0)