Turkiyaning Istanbul shahrida o‘z qizi tomonidan qiyin ahvolda qoldirilgan ayol va uning o‘g‘li O‘zbekistonga qaytarildi, deb xabar bermoqda Bosh konsulxona axborot xizmati.
Ma’lum qilinishicha, Bosh konsulxonaga 45 yoshli fuqaro I.G. murojaat qilib, o‘zi va voyaga yetmagan farzandi Istanbulda qiyin ahvolda qolgani sababli O‘zbekistonga qaytishda yordam berishni so‘radi. Avgust oyida fuqaro 19 yoshli qizi A.B.ni madrasada diniy ta’lim olish uchun Istanbulga yuborgan.
Oradan biroz vaqt o‘tgach esa ishlab pul topish va farzandiga g‘amxo‘rlik qilish maqsadida o‘zi ham 12 yoshli o‘g‘li bilan qizining oldiga Istanbulga kelgan. Biroq Istanbulga kelgach, qizi madrasada o‘qimayotganini, qolaversa, begona bir erkak bilan “shar’iy” nikohdan o‘tish niyatida ekanini bilgan.
Farzandiga nasihat bergan ona qizining qarshiligiga uchragan hamda o‘z farzandi tomonidan ko‘chaga chiqarib yuborilgan va shu tariqa 12 yoshli o‘g‘li bilan ko‘chada qolgan.
Qiyin sharoitda qolgan ona-bola Bosh konsulxona va Tashqi mehnat migratsiyasi agentligining Istanbul shahridagi vakili, “O‘zbek ayollari huquqlarini himoya qilish” jamiyati ko‘magida va O‘zbekiston musulmonlari idorasi Andijon viloyati vakilligi homiyligi yordamida O‘zbekistonga yuborilmoqda.
Fuqarolarning qaytishi uchun ko‘rsatgan beg‘araz yordamlari uchun O‘zbekiston musulmonlari idorasi Andijon viloyat vakilligiga minnatdorlik bildirildi.
Bundan avval O‘zbekistonlik 21 yoshli ayol ammasi taklifiga ko‘ra Istanbulga borib, ko‘chada qolib ketgani ma’lum bo‘lgandi. “Xalqaro o‘zbek sanoatchilari, tadbirkorlar va ilm insonlari jamiyati” a’zolari homiyligida aviachipta va boshqa to‘lovlari qoplandi. Yordam bergan barchaga ayol va konsulxona nomidan tashakkur bildirildi.
Izoh (0)