Yaponiya Mudofaa vazirligi xavfsizlik sektori xarajatlari uchun budjetdan rekord darajada — 8,54 trillion iyen (taxminan 59 milliard dollar) ajratishni so‘radi.
So‘rov ko‘rib chiqish uchun Moliya vazirligiga yuboriladi, shundan so‘ng dekabr oyi oxirida uni tasdiqlash to‘g‘risida qaror qabul qilinadi. Kelgusi yil budjeti deyarli tarixdagi eng katta byudjet bo‘lishi kutilmoqda — Yaponiya ketma-ket 11-marta o‘z rekordini yangilaydi.
Qayd etilishicha, mablag‘lar Tokio oxirgi paytlarda diqqatini qaratayotgan barcha sohalarga yo‘naltiriladi. Masalan, havo hujumi, raketa zarbalariga qarshi mudofaani rivojlantirish, dronlar va uzoq masofaga uchadigan raketalar ishlab chiqarish shular jumlasidandir.
Yaponiyada yuqori harbiy texnologiyalarning rivojlanishiga qaramay, mudofaa kuchlarining asosiy muammolaridan biri kadrlarning yetishmasligi bo‘lib qolmoqda. Mamlakat armiyada xizmat qilish uchun kerakli miqdordagi odamni jalb qila olmayapti.
2023-yil fevral oyida ushbu muammoni hal qilish bo‘yicha komissiya rasmiylar harbiy xizmatchilarning maoshlarini oshirishi va ularning turmush sharoitini yaxshilashga e’tibor qaratishi kerakligini ta’kidladi. Biroq kadrlarga ajratilayotgan mablag‘lar pasayishda davom etmoqda. Bu yilgi mudofaa byudjetining 29 foizi armiya xizmatchilariga ajratilishi ko‘zda tutilgan bo‘lsa, keyingi yil bu ko‘rsatkich 27% bo‘lishi kutilmoqda.
Izoh (0)