Rossiya hukumati Belgorod viloyati hududida 14-avgustdan boshlab umumiy favqulodda holat eʼlon qilgan. Bu haqda “TASS” nashri xabar berdi.
Ushbu qarorga kelishga Kurskdagi janglarning Belgorodga ko‘chish ehtimoli sabab bo‘lgan. Rasmiylar tezkor qaror chiqarib xavfsizlik xizmatlarini bo‘linmalarini chegara o‘tkazish punktlari atrofiga joylashtirishni boshlagan.
Belgorod rahbariyati favqulodda holat faqat Belgoroddagina emas, balki butun mamlakat miqyosida — federal darajada tashkil etilishi kerakligini bildirgan. Chunki chegarada yirik qo‘riqlash kuchlari yo‘qligi bois Ukraina Kurskdagi kabi hujumni istalgan boshqa bir viloyatda sodir etishi mumkin.
“Keyinchalik biz hukumat komissiyasiga federal darajadagi favqulodda holat eʼlon qilishni so‘raymiz. Vaziyatdan kelib chiqib baribir bu qarorga kelishga majbur bo‘lamiz”, degan Belgorod gubernatori Vyacheslav Gladkov.
Rossiya rasmiylariga ko‘ra, Belgorod chegarasida har kuni havo hujumlari kuzatilmoqda. Chegara chizig‘i yaqinida o‘q uzish holatlari ko‘paygan.
“Belgorod viloyatidagi vaziyat nihoyatda murakkab va tarangligicha qolmoqda. Ukraina qurolli kuchlari har kuni o‘qqa tutmoqda, uylar vayron bo‘lmoqda. Tinch aholi orasida qurbonlar bor. Shuning uchun bugundan boshlab Belgorod viloyatining butun hududi aholini qo‘shimcha himoya qilish va qo‘llab-quvvatlash maqsadida mintaqaviy darajadagi favqulodda vaziyat hududi deb eʼlon qilinadi”, deyiladi rasmiylar xabarida.
Maʼlumot o‘rnida, 9-avgust Ukraina harbiylari Kursk, Bryansk va Belgorod viloyatlarida aksilterror amaliyoti o‘tkazilishini maʼlum qilgan. Bunga javoban bu uch viloyatda favqulodda rejim joriy qilishga qaror qilingan. Bungacha qo‘shni davlat harbiylari Kurskning janubini egallab olgandi. Moskvaning keskin qarshi bayonotlariga qaramay ukrain bo‘linmalarining Rossiya hududida mavjudligi saqlanib qolmoqda.
Izoh (0)