O‘zbekistonda 2023-yil yakunlari bo‘yicha auditorlik xulosasini topshirmagan 110 ta IT Park rezident aniqlandi, deb xabar beradi IT Park matbuot xizmati.
Qayd etilishicha, IT Park rezidenti maqomi kompaniyalarga nafaqat O‘zbekistonda, balki xalqaro maydonda ham rivojlanish uchun ko‘plab imkoniyatlar yaratib, soliq imtiyozlari, Zero Risk, Local2Global va boshqa maxsus qo‘llab-quvvatlash dasturlari ko‘rinishidagi davlat tomonidan ko‘rsatiladigan yordamni kafolatlaydi. Rezident kompaniyalar esa o‘z faoliyatini xolisona amalga oshirishi va Vazirlar Mahkamasining qarori bilan belgilangan qoidalarga rioya qilishi lozim.
Hukumat qarori va IT Park rezidentining faoliyat shartlari to‘g‘risidagi shartnomaga muvofiq bir qator majburiy shartlar belgilangan:
- ro‘yxatga muvofiq biznes-rejada ko‘rsatilgan faoliyat turlarini amalga oshirish;
- har yili moliyaviy-xo‘jalik faoliyatini auditdan o‘tkazish, auditorlik xulosasining nusxasini IT Park’ka yuborish va boshqalar.
IT Park rezidentlariga qo‘yiladigan talablar mamlakat hamda kompaniyalarning innovatsion va texnologik taraqqiyotiga hissa qo‘shadigan raqobatbardosh muhitni saqlab qolish va rivojlantirishga qaratilgan.
Vazirlar Mahkamasi qarori bilan belgilangan majburiyatlar va talablarning bajarilishi yuzasidan o‘tkazilgan monitoring natijalariga ko‘ra, 2023-yil yakunlari bo‘yicha auditorlik xulosasini topshirmagan 110 ta rezident aniqlangan. Mazkur kompaniyalar IT Park oldidagi majburiyatlarini bajarmagan, shu munosabat bilan ular barcha soliq imtiyozlari va preferensiyalarini bekor qilgan holda rezident maqomidan mahrum etilgan.
Ushbu rezidentlarning ro‘yxati Soliq qo‘mitasiga yuborilgan.
_1722678667.jpg)
_1722678695.jpg)
Eslatib o‘tamiz, 2024-yilning boshidan IT Park rezidentlari multimedia va dizayn xizmatlarini (veb-dizayn, grafik dizayn, kompyuter o‘yinlari dizayni, vektor grafikasi, 3D grafika, vizualizatsiya dizayni, moushen-dizayn) taqdim etish, dasturiy mahsulotdan foydalangan holda multiplikatsiya mahsulotlarini ishlab chiqarish, axborot texnologiyalari sohasida venchur moliyalashtirish va akseleratsiya dasturlarini amalga oshirish faoliyatini, shuningdek, kibersport sohasida xizmatlar ko‘rsatish huquqiga ega bo‘lgandi.
Izoh (0)