Toshkent shahrida ikki nafar shifokor bemor va uning o‘rtoqlari tomonidan ayovsiz kaltaklangani haqida xabar berilgandi. SSV holat yuzasidan qo‘shimcha tafsilotlarni ochiqladi.
Unga ko‘ra, tibbiyot xodimlariga jiddiy tan jarohati yetkazgan ushbu shaxslarga nisbatan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Jinoyat ishi doirasida 3 nafar ayblanuvchi shaxsga nisbatan qamoqqa olish ehtiyot chorasi qo‘llanib, ayni paytda tergov harakatlari davom etmoqda.
Bu borada Sog‘liqni saqlash vazirligi tergov organi bilan yaqin hamkorlikda ish olib bormoqda.
Holat qanday bo‘lgan?
27-iyul kuni soat taxminan 07:20 larda poytaxtdagi 1-son shahar klinik shifoxonasi qabul bo‘limiga Sergeli tumani, Xonobod 4-tor ko‘chasida istiqomat qiluvchi, 1997-yilda tug‘ilgan fuqaro B.I. ikki nafar o‘rtog‘i — 1997-yilda tug‘ilgan P.I. va S.B.lar hamrohligida olib kelingan.
Bemor zudlik bilan navbatchi travmatolog-shifokor A.A. tomonidan tibbiy ko‘rikdan o‘tkazilgan. Dastlabki tekshiruv davomida unga “Ikkala qo‘l-bilak sohalari, ko‘krak qafasi va qorin oldi devorining ko‘plab kesilgan jarohatlari. Gemorragik shok 2-3-daraja” tashxisi qo‘yilgan.
Bemorning holati og‘ir, shok holatida deya baholanib, zudlik bilan qon to‘xtatish va shokka qarshi birinchi tibbiy yordam ko‘rsatilgan hamda qo‘shma shikastlanishlar shoshilinch bo‘limining mikroxirurgiya o‘rniga gospitalizatsiya qilingan. Soat 07:40 da tanadagi ko‘plab kesilgan jarohatlar inobatga olinib, u darhol xirurgik amaliyot o‘tkazish maqsadida mikroxirurgiya operatsiya xonasiga olib kirilgan.
Xirurgik amaliyotga tayyorlash vaqtida bemor shifokor-mikroxirurg M.X.ga jiddiy qarshilik ko‘rsata boshlagan va tibbiyot xodimiga tarsaki tushirib, uni haqorat qilgan.
Shuningdek, B.I.ni tinchlantirishga urinishlar samara bermagach, u operatsion stoldan tushib, shifokorni qattiq do‘pposlay boshlagan. Shundan keyin shifokor M.X. ichki ishlar organlarining 102 telefon raqamiga qo‘ng‘iroq qilib, vaziyat yuzasidan navbatchi qismga ma’lumot bergan.
So‘ng shifokor M.X. bemorning o‘rtoqlari — P.I. va S.B.lar tomonidan ham kaltaklangan. Shu vaqtda shoshilinch xirurgiya bo‘limining navbatchi shifokori H.U. bemorga xirurgik amaliyotni bajarish uchun operatsion blokka kelgan. Yigitlar bu tibbiyot xodimini ham ayovsiz do‘pposlab, unga jiddiy tan jarohati yetkazgan.
Oqibatda shifokor hushidan ketib, karaxtlik-koma holatiga tushgan va zudlik bilan reanimatsiya bo‘limiga yotqizilgan.
O‘tkazilgan dastlabki tibbiy tekshiruvlar davomida jabrlanuvchi shifokorga “Bosh-miya yopiq jarohati. Bosh miya lat yeyishi o‘rta darajasi. 3-bel umurtqasi chap yon qanotining yopiq sinishi. Bosh peshona qismi terisining shilingan jarohati. O‘ng tomonlama lab burchagining yorilishi” tashxisi qo‘yilib, shoshilinch reanimatsion chora-tadbirlar ko‘rilgan.
O‘tkazilgan davo muolajalari natijasida bemorning holati biroz ijobiy tomonga o‘zgarib, hushiga kelgan va shok holatidan chiqarilgan. Ammo unda hali ham karaxtlik mavjud. Shu bois davo muolajalari jonlantirish bo‘limida davom ettirilmoqda.
Ikkinchi shifokor M.X.ning holati hozir nisbatan qoniqarli, lekin olgan bosh miya jarohati va ruhiy holati keskin yomonlashgani inobatga olinib, shifoxonaning qo‘shma jarohatlar bo‘limi travmatologiya qismiga gospitalizatsiya qilingan va kerakli tibbiy muolajalar ko‘rsatilyapti.
Izoh (0)