Polshaning Varshava shahrida 26 yoshli o‘zbekistonlik yigit 15 yoshli ukrainalik ikki o‘smirga pichoq bilan hujum qilgani haqida xabar berilgan edi. Unda voqea 22-iyul kuni Brodno bog‘ida sodir bo‘lgani va jarohatlangan o‘smirlar kasalxonaga yotqizilgani aytilgandi.
Mazkur holatga oydinlik kiritish maqsadida “Daryo” muxbiri O‘zbekistonning Polshadagi elchixonasi bilan bog‘landi.
Aytilishicha, bog‘da 4 nafar ukrainalik o‘zbekistonlik fuqaroni talon-toroj qilish maqsadida unga hujum qilgan.
Fuqaromiz hujumdan tan jarohati olgan. U o‘zini himoya qilish maqsadida pichoqdan foydalangan.
Ayni vaqtda tergov harakatlari olib borilmoqda. Unda O‘zbekiston fuqarosi aybdor emas, aksincha, jabrlanuvchi sifatida ishtirok etmoqda, — deya xabar bermoqda diplomatik vakolatxona.
Yigitga konsullik huquqiy yordami ko‘rsatilgan va tarjimon bilan ta’minlangan.
Qo‘shimcha qilinishicha, bugun 24-iyul kuni O‘zbekiston fuqarosi tergov eshituvidan keyin qo‘yib yuboriladi.
Izoh (0)