Turkiya tashqi ishlar vaziri Xoqon Fidan Rossiya prezidenti Vladimir Putinning mamlakatga tashrifi yuzasidan muzokaralar yaqin kelajakda qayta boshlanishi mumkinligini aytdi. Bu haqda Haberturk xabar berdi.
“Putin bizga tashrif buyurishini kutmoqdamiz. Prezidentimiz uni avvalroq taklif qilgandi, tashrif haqida gap ketgandi. Lekin avval Rossiyada, keyin esa bu yerda (Turkiyada) saylovlar bo‘lib o‘tdi. Balki yaqin kunlarda liderlar bu masalani yana muhokama qilishar”, — dedi Xoqon Fidan.
Rossiya prezidenti matbuot kotibi Dmitriy Peskov “RIA Novosti” bilan suhbatda Rossiya va Turkiya prezidentlari Ostonada muzokaralar o‘tkazishni rejalashtirganini aytdi. Uning so‘zlariga ko‘ra, hozir Qozog‘iston poytaxtida uchrashuv o‘tkazish imkoniyati o‘rganilmoqda.
Vladimir Putin 2023-yil dekabr oyida Turkiyaga rasmiy tashrif bilan borishi haqida ma’lum qildi. Rajab Toyyib Erdo‘g‘on 31-martdan keyin Putin bilan uchrashishni kutayotganini aytdi. Kreml matbuot kotibi Dmitriy Peskov esa uchrashuv prezidentlarning ish jadvallari bir-biriga mos kelmagani sababli qoldirilganini aytgandi.
Izoh (0)