Birlashgan Millatlar Tashkiloti Xavfsizlik Kengashi Sudanning Al-Fashir shahridagi katta yo‘qotishlarga olib kelgan hujumni to‘xtatishga chaqirdi. Bu haqda UN News manbasi eʼlon qilgan bayonotga asoslanib, Al Jazeera xabar bermoqda.
Manbada aytilishicha, Sudanning Shimoliy Darfur viloyati markazi hisoblangan Al-Fashir shahrida mamlakat armiyasi va Tezkor qo‘llab-quvvatlash kuchlari o‘rtasida janglar avjiga chiqqan. Tinch aholi orasida ko‘plab qurbonlar kuzatilgan.
BMT rezolyutsiyasi Sudan harbiylari va Tezkor qo‘llab-quvvatlash kuchlarini tinch aholi himoyasini taʼminlashga va zo‘ravonlikni zudlik bilan to‘xtatishga chaqirgan. Talab bajarilmasa, xalqaro aralashuv xavfi haqida ogohlantirilgan.
Payshanba kuni, 13-iyun kuni eʼlon qilingan rezolyutsiyaga Rossiya betaraf munosabat bildirgan. Xavfsizlik Kengashining qolgan 14 aʼzosi esa uni qo‘llab-quvvatlagan. Rezolyutsiya o‘t ochishni to‘xtatish talabini asosan Tezkor qo‘llab-quvvatlash kuchlari rahbariyati oldiga qo‘ygan.
BMT Sudanda zo‘ravonlik ko‘lami butun mamlakat bo‘ylab past surʼatda davom etayotganini bildirgan. Ko‘plab viloyatlar hududida “etnik sabablarga ko‘ra zo‘ravonlik” amalga oshirilayotgani haqida xabar berilgan.
Maʼlumot o‘rnida, Sudandagi harbiy mojaro 2023-yilning aprel oyida general Abdul Fattoh al-Burhon boshchiligidagi Sudan Qurolli Kuchlari (SAF) va general Muhammad Hamdan “Hemedti” Dagaloga sodiq bo‘lgan Tezkor qo‘llab-quvvatlash kuchlari o‘rtasida boshlangan edi.
BMT hisob-kitoblariga ko‘ra, zo‘ravonliklar hozirga qadar kamida 14 ming kishining hayotiga zomin bo‘lgan. 10 milliondan ortiq odam boshpanasiz qolgan.
Izoh (0)