Tayvan Xitoyning orol yaqinida o‘tkazayotgan harbiy mashg‘ulotlari tufayli samolyotlarini havoga ko‘tardi, raketa, dengiz va quruqlik bo‘linmalarini shay holatga keltirdi. Bu haqda orol Mudofaa vazirligi xabar berdi.
Xitoy harbiylari Tayvan atrofidagi ikki kunlik mashg‘ulotlar “mustaqillikka intilayotgan separatistik kuchlar uchun jazo bo‘lishini” ta’kidlagandi. Xitoy armiyasining mashg‘ulotlari Tayvanning yangi prezidenti Lay Sindze 21-may kuni lavozimga kirishganidan so‘ng boshlangan.
“Xitoyning mantiqsiz provokatsiyasi mintaqaviy tinchlik va barqarorlikni xavf ostiga qo‘ydi”, — deydi Tayvan mudofaa vazirligi.
Shuningdek, bayonotda Tayvan mojaroga intilmasligi, lekin “bundan qochmasligi” taʼkidlangan.
“Harbiy mashg‘ulotlar uchun bu bahona nafaqat Tayvan bo‘g‘ozi hududida tinchlik va barqarorlikka hissa qo‘shmaydi, balki uning gegemon xarakterini ham chuqur namoyon etadi”, — deyiladi bayonotda.
Ta’kidlanishicha, 23-may davomida harbiylar orol yaqinida 50 ga yaqin Xitoy qiruvchi samolyotlari va boshqa aviatexnikalarni ko‘rgan. Ulardan 35 ga yaqini “havo hududini buzgan”, ya’ni orol Xitoy bilan shartli chegara deb hisoblagan Tayvan bo‘g‘ozining o‘rta chizig‘ini kesib o‘tgan. Xitoyning mashg‘ulotlari 23–24-may kunlari bo‘lib o‘tadi.
Izoh (0)