Mashhurlarning hashamatli, did bilan ishlangan va noyob dizaynga ega uylari doim hayratda qoldiradi. Ularni faqat rasmlarda emas, balki real hayotda ham ko‘rishni istaydigan muxlislar uchun buning yo‘li bor. Buning uchun yulduzlar uyida ijaraga yashab ko‘rish mumkin.
Aktrisa Sara Jessika Parkerning sohil bo‘yidagi uyi
Aktrisaning Sharqiy Xemptonda joylashgan ko‘chmas mulki dizayni dengiz uslubida yaratilgan bo‘lib, interyerda oq, ko‘k rang va qum tuslari o‘rin olgan. Shinam uy uchta yotoqxona, kaminli mehmonxona, oshxona, yozgi ayvon va shahar shovqinidan yashirinishingiz mumkin bo‘lgan yam-yashil bog‘dan iborat. Bunday xonadonning bir kunlik ijarasi 2 kecha uchun atigi 20 dollarni tashkil etadi.
Aktyor Leonardo Di Kaprioning villasi
Di Kaprioga tegishli Kaliforniyadagi Palm Springs shahrida joylashgan hashamatli uy oltita yotoqxona, suzish havzasi, tennis korti, spa va ochiq kaminga ega mehmonxonani o‘z ichiga oladi. Bunday hashamatning bir kecha uchun ijara narxi 3750 dollardan boshlanadi.
Qo‘shiqchi Stingning italyan uslubdagi uyi
Sting va uning rafiqasi Trudi Staylerga tegishli bo‘lgan 16-asrda qurilgan villa haqiqiy san’at asaridek: go‘zal bog‘lar, 900 funt kenglikda ekilgan zaytun daraxtlari va yevropacha dizayn uyga o‘zgacha ko‘rk baxsh etgan. Villada ovoz yozish studiyasi, bolalar maydonchasi va tennis korti mavjud. Yulduzli juftlik yoz faslini aynan shu uyda o‘tkazadi. Yilning qolgan fasllarida uy ijaraga beriladi. Ijara haqqi yashash uchun kelgan shaxslar soni va mavsumga qarab farq qiladi.
Aktyor Xyu Jekmanning Xemptondagi uyi
2023-yil yanvar oyida aktyor Xyu Jekman va uning rafiqasi, aktrisa Deborra-Li Ferness Sharqiy Xemptondagi uyini ijaraga berishini e’lon qildi. Dengiz bo‘yida joylashgan mazkur uy minimalizm dizaynida bo‘lib, unda beshta yotoqxona, beshta hammom, basseyn, spa joylashgan. Uyning bir qismi Gardiner ko‘rfaziga qaragan. Ijara haqqi bir kecha uchun 5555 dollarni tashkil qiladi.
Izoh (0)