“Tolibon” hukumati mamlakat g‘arbidagi Hirot shahrida Rossiya neftini Janubiy Osiyoga yetkazib berishda foydalaniladigan tranzit markaz qurmoqda. Bu haqda Sputnik Afg‘oniston nashri xabar berdi.
Manbada aytilishicha, Hirotda qurilayotgan logistika markazi Rossiyaning millionlab tonna neft mahsulotlarini Janubiy Osiyo mamlakatlariga, xususan, Pokistonga yetkazib berish maqsadida tashkil etilmoqda. Ushbu logistika inshootining dastlabki quvvati bir million tonnani tashkil etadi.
Yangilik haqida dastlab “Tolibon” Savdo va sanoat vazirligi matbuot kotibi Abdulsalom Javad maʼlum qilgan. Tranzit markazi 2 oy muddatda yakunlanishi xabar qilingan.
Logistika markazi uch davlat kompaniyalari ishtirokida tashkil etilishi belgilangan. Keyinchalik savdo va tranzit sohasiga qiziqish bildirgan barcha davlatlar ushbu yo‘nalishdan foydalanishi mumkin.
Rasmiylar bu tranzit markazi Afg‘oniston uchun savdo va logistika nuqtai nazaridan juda muhim ekanini bildirgan. Chunki mamlakat hududida hali biror bir aktual xalqaro savdo koridori mavjud emas.
Bu markaz mintaqa davlatlari va hatto Yevropa uchun hamkorlik vositasi bo‘lishi mumkin. Markaz qurilishi uchun byudjet hali kelishilmagan. Bu markaz infratuzilmasi xususiy va tijorat sektori uchun hech qanday taqchillik yaratmasligi uchun Osiyo va Yevropa darajasidagi barcha imkoniyatlar bilan taʼminlangani xabar qilingan.
Izoh (0)