“Kiyev Rossiya bo‘yicha o‘z pozitsiyasini tinchlik sammitidan so‘ng e’lon qiladi” — Ukraina rasmiysi

Iyun oyida Shveysariyada bo‘lib o‘tadigan global tinchlik sammiti Rossiya bilan muzokaralarda foydalanish uchun umumiy pozitsiyani ishlab chiqadi. Bu haqda Ukraina prezidenti matbuot kotibi Sergey Nikiforov DW’ga bergan intervyusida xabar berdi.

Ukraina va Shveysariya tinchlik sammitini tashkil qilmoqda, unda xalqaro huquq va BMT nizomini hurmat qiladigan davlatlar muzokaralar bo‘yicha umumiy pozitsiyani ishlab chiqishlari va uni Rossiyaga topshirishlari kerak, — dedi Nikiforov.

Avvalroq Ukraina Mudofaa vazirligi vakili Vadim Skibitskiy The Economist nashriga bergan intervyusida “Ukraina Rossiyani faqat jang maydonida mag‘lub eta olmasligini” aytgan. Uning so‘zlariga ko‘ra, Ukraina armiyasi Rossiya harbiylarini 1991-yilgi chegaralargacha siqib chiqarsa ham, bu bilan urush tugamaydi. U bunday urushlar faqat kelishuvlar bilan yakunlanishi mumkinligini qo‘shimcha qilgan.

Ukraina bo‘yicha global tinchlik sammiti 15–16-iyun kunlari Shveysariyaning Byurgenshtok kurortida bo‘lib o‘tadi. Anjumanda 100 ga yaqin davlat ishtirok etishi kutilmoqda.

Mazkur sammitga Rossiya taklif qilinmagan. Moskva, o‘z navbatida, bunday uchrashuv Rossiya ishtirokisiz mantiqsiz bo‘lishini ta’kidlagan.