“Nihol” mukofoti sovrindori Feruza Jumaniyozovaning onasi Zuhra Jumaniyozova 66 yoshida vafot etdi.
Zuhra Jumaniyozova 1958-yilda Xorazm viloyatida tug‘ilgan. Uzoq yillar xalfachilik yo‘nalishidagi yorqin ijodi, xotin-qizlarning dard-u alamlari, dil isyonlari, muhabbat va sadoqati haqidagi ijod namunalari bilan Xorazm san’ati rivojiga hissa qo‘shgan. Zuhra ona qizi Feruzaning san’atdagi asosiy ustozi, prodyuseri edi. Xonanda mashhur san’atkor bo‘lishida onasining ko‘p mehnati singgani haqida intervyularida ko‘p ta’kidlardi.
“Haligacha esimda, Toshkentga oyim bilan avtobusning bir o‘rindig‘ida kelganmiz. Oyimning oldida harbiy xizmatdan kelgan askar o‘tirgan, shunda oyim undan: “Qizim sening oldingda o‘tirib tursa maylimi”, — deb so‘ragan. Avtobusning ikkita o‘rindig‘idan joy sotib olishga pulimiz bo‘lmagan. Haligi bola xizmatdan charchab kelayotganini aytgan. Shunaqa qiyinchiliklardan o‘tganmiz.
Qiyinchiliklar Toshkentga kelganimdan keyin boshlandi. Onamga: “Qizing turmush o‘rtog‘im bilan yuribdi”, — deb tuhmat qilishgan. Bu onamga qattiq ta’sir qilgan, — degan edi Feruza Jumaniyozova intervyularidan birida.
Izoh (0)