Isroil Madrimov matbuot anjumanida ishtirok etish uchun AQSHga jo‘nab ketdi

O‘zbekistonlik bokschi Isroil Madrimov matbuot anjumanida ishtirok etish uchun AQSHga jo‘nab ketdi.

Butunjahon boks tashkiloti (WBO) Madrimov — Krouford jangi g‘olibi WBO yo‘nalishining vaqtinchalik kamarini qo‘lga kiritishini ma’lum qildi.

Ushbu jangda g‘alaba qozongan bokschi birinchi o‘rta vazn toifasida vaqtinchalik (Interim) WBO kamari sohibiga aylanadi. 

Ma’lumot uchun ushbu vazn toifasida WBO yo‘nalishi chempioni Sebastyan Fundora hisoblanadi. 

Madrimov matbuot anjumanida ishtirok etish uchun AQSHga yo‘l oldi. Aynan shu anjumanda Madrimov — Krouford jangi rasman e’lon qilinadi. WBO kamari uchun kechadigan jang 3-avgust kuni Los-Anjeles shahrida o‘tkazilishi kutilmoqda. 

Qayd etib o‘tish joiz, o‘tgan yilning 30-iyul kuni Krouford hamyurti Errol Spensni to‘qqizinchi raundda texnik nokautga uchratib, yarim o‘rta vazn toifasida mutlaq jahon chempioniga aylangan edi.

Amerikalik chempion professional ringda o‘tkazgan 40 ta jangining barchasida g‘alaba qozongan. G‘alabalarining 31 tasiga nokaut orqali erishgan.

Eslatib o‘tamiz, Isroil Madrimov 8-mart oqshomida Saudiya Arabistonining Ar-Riyod shahrida rossiyalik Magomed Kurbanovni 5-raundda nokautga uchratib, WBA kamarini qo‘lga kiritgandi.