Shimoliy Qozog‘iston viloyatidagi Sergeyevskiy suv omborining sig‘imi 175 foizni tashkil qilmoqda (hajmi – 1213 million kub metr). Suv oqimi to‘g‘ondan 390 santimetr baland. Bu haqda “Petropavlovsk.news” xabar berdi.
Bu Sergeyevskiy suv ombori ishga tushirilgandan beri, ya’ni 1968-yildan beri kuzatilmagan va to‘g‘ondagi suv oqimi 338 santimetr bo‘lgan 2017-yildagi tarixiy maksimal ko‘rsatkichdan 52 santimetrga ko‘pdir.
“Sergeyevskiy gidroelektr majmuasidan yuqoridagi Ishim irmoqlarida suv keskin pasaya boshlagan. Bu suv toshqini cho‘qqisini bildiradi. Endi Sergeyevskiy suv ombori to‘g‘onining quyi oqimidagi aholi punktlari, shuningdek, yirik ko‘llar yaqinidagi qishloqlar uchun xavfli davr boshlandi: Katta Tarangul uyg‘onmoqda”, — deyiladi xabarda.
Eslatib o‘tamiz, Qozog‘istonda suv toshqini tufayli deyarli 64 ming kishi evakuatsiya qilingan. Mamlakatda suv toshqini bilan bog‘liq vaziyat og‘irligicha qolmoqda. 6-aprel kuni prezident Qosim-Jo‘mart To‘qayev Qozog‘iston xalqiga murojaat qilgan. Uning so‘zlariga ko‘ra, “hozirgi vaziyat, ehtimol, miqyosi va oqibatlari bo‘yicha so‘nggi 80 yildan ortiq vaqt mobayniyda kuzatilgan eng katta ofat”dir.
Suv toshqinlari sababli mamlakatning o‘nta viloyatida (Abay, Aqmo‘la, Aqto‘be, Atirau, G‘arbiy Qozog‘iston, Qarag‘anda, Qo‘stanay, Pavlodar, Shimoliy Qozog‘iston va Ulitov viloyatlari) mahalliy darajadagi favqulodda holat e’lon qilingan. Turkiya suv toshqinlarining oldini olishda Qozog‘istonga yordam ko‘rsatishga tayyorligini bildirgan.
Izoh (0)