Ekvador Oliy sudi evtanaziyani dekriminalizatsiya qildi va mamlakat qonunchilariga ushbu tartib qoidalarini ishlab chiqishni topshirdi. Bu haqda ABC News xabar berdi.
Ekvador Konstitutsiyaviy sudi 42 yoshli o‘ta xasta ayolning davlatga qarshi da’vosi yuzasidan qaror chiqardi. Ayol evtanaziyaga rasman ruxsat berishni talab qilgan. Unga to‘rt yil avval amiotrofik lateral skleroz tashxisi qo‘yilgan.
Bu kamdan-kam uchraydigan va davolanib bo‘lmaydigan kasallik bo‘lib, asta-sekin mushaklar atrofiyasi va falajiga olib keladi. Ekvadorlik ayol unga evtanaziyaga ruxsat berishlarini so‘ragan.
U 2023-yil avgust oyida sudga “erkin va ixtiyoriy ravishda o‘z hayotidan voz kechish” va kundalik azoblarni boshdan kechirishni to‘xtatish uchun murojaat qilgan.
Ekvador Konstitutsiyaviy sudi ayolning da’vosini qanoatlantirgan. Endilikda Ekvador qonun chiqaruvchi organi bir yil ichida rasmiy evtanaziya qoidalarini ishlab chiqishi kerak.
Ilgari evtanaziyaga ruxsat bergan yagona Lotin Amerikasi davlati Kolumbiya edi. Evtanaziya Belgiya, Ispaniya, Lyuksemburg, Niderlandiya, Yangi Zelandiya, Kanada va Avstraliyaning ayrim shtatlarida ham qonuniydir. Chilida esa qonuniylashtirish imkoniyati muhokama qilinmoqda. Boshqa bir qator mamlakatlarda “o‘z joniga qasd qilish”ga ruxsat beriladi, bunda bemorga shifokor nazorati ostida o‘ldiradigan dori dozasi yuboriladi.
Izoh (0)