Aktrisa Sitora Farmonova Instagram tarmog‘i orqali unga va yaqinlariga tahdid qilayotgan muxlisi haqida maʼlumot berdi.
— Menga tahdid qilayotgan “mavjudot”ning rasmini tarmoqqa joylasam, baʼzi insonlar menga nisbatan negativ fikr bildirdi. U odam menga sovchi qo‘yib, uylanaman, deb maqsad qilmagan.
Bu odam Instagram profilimga joylangan ukamning telefon raqamini olib, qo‘ng‘iroq qilgan. “Menga uylanishga qiz kerak”, degan. Ukam hayron bo‘lib “Uzr, sizga bu masalada yordam berolmaymiz”, degan. “Sen boylar, biz kambag‘allarni mensimayapsanlarmi?” degan. Ukam unga “Men sizni tanimayman, siz ham kimligimni bilmaysiz? Qo‘ng‘iroq qilib, bunday gaplarni gapirmang. Balki adashib boshqa raqamga tushgandirsiz”, deb to‘g‘ri tushuntirishga harakat qilgan. Shu gapdan keyin “Sen Sitorani maʼmurimisan? Nega senlar boy yashashing kerak? Bizlar qiynalib, kambag‘al bo‘lib yashashimiz kerak?” deb ukamga janjal qilishni boshlagan. Birinchidan har bir insonning rizqini Alloh beradi. Ikkinchidan bu insonning yozgan gaplarini o‘qisangiz, tepa sochingiz tikka bo‘ladi. U meni qarg‘ab “Ilohim ikki dunyo xor bo‘lgin, rozimasman. Sanlar boysan, biz kambag‘almiz”, deb kurakda turmaydigan so‘zlarni yozgan. Men hech qachon odam ajratmaganman, shu kungacha birorta insonga zarar yetkazishga harakat qilmaganman. Qanaqasiga odam tanimagan, bilmagan insonini shunchalik qarg‘ashi mumkin?
Ukamga yana qo‘ng‘iroq qilib haqorat qilgan. O‘sha vaqt ukam onam bilan birga mashinada bo‘lgan va u odamning gaplarini onam ham eshitgan. “Agar sen opangni kambag‘al insonga turmushga bermayman, deb maqsad qilgan bo‘lsang, opangni o‘ldirib, eshiging tagiga osib ketaman. Ota-onangga ayt, kafanlik tayyorlab qo‘ysin”, degan. Bu gaplarni eshitgandan keyin onamning yuragi yomon bo‘lib, uyga tez yordam chaqirishimizga to‘g‘ri keldi. Dalillarni tegishli idoralarga taqdim etganimizdan keyin tahdid qilayotgan odam 15 sutkaga ozodlikdan mahrum etildi. Ammo tavbasiga tayanmay, ozodlikka chiqqan kuni yana qo‘ng‘iroq qilib, yana tahdid qilishni boshladi. Keyin onasi ukamga qo‘ng‘iroq qilib “O‘g‘lim uchun sizlardan kechirim so‘rayman. U ichib olsa hatto meni tanimay urib ketadi”, dedi. Ukam yana vazminlik bilan “O‘g‘lingiz kasal bo‘lsa nega davolatmaysiz? Bizni tanimay, bilmay turib nega bunchalik tahdid qilyapti?” desa “Toshkentda o‘g‘limning giyohvand o‘rtog‘i bor. O‘sha o‘g‘limga Rossiyada ishlab ‘deport’ bo‘lib O‘zbekistonga qaytib kelding. Bu yerda ishlab pul topolmaysan. Sen yaxshisi boy qizni topgin-da, unga uylangin, debdi. O‘g‘lim menga Sitoraga uylansam, uning hamma narsasi bor, boy qiz. Siz qishloqda qiynalib yashamaysiz, men u qizni urib, olib qochib bo‘lsa ham unga uylanaman. Siz ozgina sabr qiling, uning uyiga ko‘chib o‘tamiz. Uning xizmatkorlari bor, boy yashaymiz. Unga o‘rtog‘i “Sen u qizga uylana olasan, arziysan, janjal qilib bo‘lsa ham unga erishishing kerak”, deb o‘rgatdi debdi. Bu gaplarni eshitgandan keyin shokka tushdim. Baʼzi insonlar yaxshi ko‘rib, ko‘ngil qo‘yishi mumkin, bu holatni tushunaman. Ammo bu odamning maqsadi muhabbat emas, faqat boylik orttirish bo‘lyapti.
Tegishli organlarga murojaat qilganimizdan keyin, dadam u odamga “Maqsading nima?” deb savol berganida menga ham tuhmat qilibdi. “Qizingiz bilan bir yildan beri Instagramda gaplashamiz, u menga o‘rganib qolgan. U sizga aytolmayapti, siz esa bizni tushunishga harakat qilmayapsiz”, debdi. Men yana shokka tushdim. Yaxshiyamki, yozgan gaplari saqlanib qolgandi, ularni organ xodimlariga ko‘rsatdim.
Avvaliga u meni o‘ldirmoqchi edi. Endi butun oilam, ota-onam va ukamga ham tahdid qilyapti. Yaxshi hamki, O‘zbekistonda yashaymiz. Shahar bedarvoza emas, unga nisbatan tegishli choralar ko‘riladi, — deydi aktrisa Sitora Farmonova.
Izoh (0)