Adliya vazirining “Shaxsga doir maʼlumotlarga ishlov berishning namunaviy tartibini tasdiqlash haqida”gi buyrug‘i qabul qilindi, deb xabar beradi Norma.
Namunaviy tartib:
- shaxsga doir maʼlumotlarga ishlov berish va himoya qilish tartibini;
- shaxsga doir maʼlumotlarga ishlov berish prinsiplari, maqsadlari hamda shartlarini;
- shaxsga doir maʼlumotlar bazasining mulkdori va (yoki) operatorining huquq va majburiyatlarini belgilaydi.
Mulkdor va (yoki) operator yoxud uchinchi shaxs tomonidan shaxsga doir maʼlumotlarga ishlov berishda quyidagi talablarga rioya qilinishi lozim:
- shaxsga doir maʼlumotlarga ishlov berishni aniq va oldindan belgilangan maqsadlarda amalga oshirish;
- shaxsga doir maʼlumotlarga ishlov berishda maqsadlari bir-biriga mos kelmaydigan shaxsga doir maʼlumotlar bazalarini birlashtirishga yo‘l qo‘yilmaslik;
- shaxsga doir maʼlumotlarning aniqligi, ishonchliligi, yaxlitligi va butligini taʼminlash;
- agar shaxsga doir maʼlumotlarni saqlash muddati qonunchilikda yoki subyekt bilan tuzilgan shartnomada belgilanmagan bo‘lsa, shaxsga doir maʼlumotlarni ularga ishlov berish maqsadlariga erishish muddatidan ortiq bo‘lmagan muddatga saqlash;
- agar qonunchilik hujjatlarida boshqacha qoida nazarda tutilgan bo‘lmasa, ishlov berilayotgan shaxsga doir maʼlumotlar ishlov berish maqsadlariga erishilgandan so‘ng yoki ushbu maqsadlarga erishish zarurati yo‘qolgan taqdirda yo‘q qilinishi yoki egasizlantirilishini taʼminlash.
Shaxsga doir maxsus maʼlumotlarga ishlov berish uchun subyektning roziligi yozma shaklda yoki elektron hujjat tarzida olinishi lozim.
Ofertada (ommaviy shartnomada) shaxsga doir maʼlumotlarga ishlov berishning maqsadlari aniq ko‘rsatilgan taqdirda, ofertani (ommaviy shartnomani) qabul qilish (tasdiqlash) subyektning shaxsga doir maʼlumotlarga ishlov berishga roziligi deb hisoblanadi.
Subyektning mulkdor va (yoki) operatorning xizmatlaridan foydalanish uchun belgilangan talab va shartlarga rozilik berishi mulkdor va (yoki) operator tomonidan subyektning shaxsga doir maʼlumotlariga ishlovga berishga roziligi hisoblanadi.
Subyekt yoki uning qonuniy vakili shaxsga doir maʼlumotlarga ishlov berish to‘g‘risidagi roziligini istalgan vaqtda qaytarib olish huquqiga ega.
Shaxsga doir maʼlumotlarga ishlov berish uchun subyektning roziligi bilan quyidagi maʼlumotlar ko‘rsatilishi lozim:
- operatorning nomi, STIR (jismoniy shaxsning familiyasi, ismi va otasining ismi, JSHSHIR);
- subyektning familiyasi, ismi va otasining ismi, shaxsini tasdiqlovchi hujjat maʼlumotlari;
- shaxsga doir maʼlumotlarga ishlov berish maqsadlari;
- subyektning ishlov berishga rozilik berilayotgan shaxsga doir maʼlumotlari ro‘yxati;
- shaxsga doir maʼlumotlarga ishlov berishga rozilik amal qiladigan muddat yoki davr;
- shaxsga doir maʼlumotlarni uchinchi shaxslarga berish va (yoki) ushbu maʼlumotlarni transchegaraviy uzatishga roziligi;
- shaxsga doir maʼlumotlarni hamma foydalanishi mumkin bo‘lgan manbalarda tarqatishga roziligi;
- boshqa maʼlumotlar.
Tarixiy, statistik, sotsiologik, ilmiy tadqiqotlar o‘tkazish uchun shaxsga doir maʼlumotlarga ishlov berilayotganda mulkdor va operator, shuningdek, uchinchi shaxs bu maʼlumotlarni egasizlantirishi shart. Shaxsga doir maʼlumotlarni egasizlantirish uchun subyektning roziligini olish talab etilmaydi.
Shaxsga doir maʼlumotlarni egasizlantirish shaxsga doir maʼlumotlarni tiklash imkoniyatini istisno qiladi.
Shaxsga doir maʼlumotlar mulkdor va (yoki) operator, shuningdek, uchinchi shaxs tomonidan quyidagi hollarda 3 kun ichida yo‘q qilinishi lozim:
- shaxsga doir maʼlumotlarga ishlov berish maqsadiga erishilganda;
- subyektning shaxsga doir maʼlumotlarga ishlov berish uchun berilgan roziligi chaqirib olinganda;
- shaxsga doir maʼlumotlarga ishlov berishning subyekt bergan rozilik bilan belgilangan muddati o‘tganda;
- sudning qarori qonuniy kuchga kirganda.
Davlat organlari tomonidan shaxsga doir maʼlumotlar so‘rab olinganda, shaxsga doir maʼlumotlar subyektiga bu haqida xabarnoma yuboriladi (bundan davlat siri va qonunchilikka muvofiq foydalanish cheklangan maʼlumotlarni o‘z ichiga olgan holatlar mustasno).
Xo‘jalik birlashmalari, davlat tashkilotlari va muassasalari, nodavlat tashkilotlarga shaxsga doir maʼlumotlar uning subyekti roziligi bilan taqdim etiladi.
Hujjat qonun hujjatlari maʼlumotlari milliy bazasida eʼlon qilingan va 2023-yil 17-noyabrdan kuchga kirdi.
Bundan avval O‘zbekistonda shaxsga doir ma’lumotlarni noqonuniy tarqatganlik uchun jinoiy javobgarlik kuchaytirilishi, O‘zbekiston fuqarolarining ma’lumotlarini xorijda saqlaydigan saytlar jarimaga tortilishi hamda O‘zbekiston fuqarolarining shaxsiy ma’lumotlarini mamlakatda saqlash majburiy bo‘lishi haqida xabar berilgandi.
Izoh (0)