Yaponiyaning Tokio shahrida joylashgan Xatiko haykali atrofida xona ko‘rinishidagi installyatsiya barpo etildi.
Itning bronza haykali Sibuya temiryo‘l stansiyasidan joy olgan bo‘lib, yapon rassomi Tasu Nisino uning atrofidagi 9 kv.m hududga xona “qurishga” qaror qilgan. Natijada it xuddi xona ichida, ko‘rpa yopilgan karavot ustida o‘tirgandek ko‘rinish hosil bo‘lgan.
Nisinoning aytishicha, art-obyekt g‘oyasi bundan 10 yil ilgari o‘ylab topilgan, ijodkor so‘nggi yarim yil ichida aynan mana shu loyiha ustida ishlagan. Rassom kelgusida yanada kattaroq “asar” yaratish va unga “Xatiko mehmonxonasi” deb nom berishni rejalashtirgan.
Uycha akita-inu zotli itning tug‘ilgan kuniga 100 yil to‘lishi munosabati bilan taqdim etilgan. Xatikoning egasi professor Xidesaburo Ueno bo‘lib, u Tokio universitetida ishlagan. Jonivor har kuni egasi ishga ketayotgan vaqtda uni Sibuya stansiyasigacha kuzatib qo‘ygan va professorning ishdan qaytishini shu yerda kutib turgan.
1925-yilning 21-may kuni professor insult tufayli universitetda vafot etgan. Shundan keyin Xatikoni bir nechta oilalar asrab olishga harakat qilgan, ammo u stansiyaga kelishda davom etgan va har kuni shu yerda professorni kutgan. Xatiko egasining qaytishini 10 yil – hayotining so‘nggi kunlariga qadar stansiyada o‘tkazib, 1935-yilning 8-mart sanasida vafot etgan.
Xatikoga qo‘yilgan ilk haykal 1934-yilda, jonivor hayotlik vaqtida ochilgan. Biroq, Birinchi jahon urushi yillarida haykal yo‘q qilingan. 1948-yilda esa qayta tiklangan.
Izoh (0)