Mudofaa vazirligi “O‘zbekiston Respublikasi prezidentining ayrim qarorlariga o‘zgartirishlar kiritish to‘g‘risida”gi prezident qarori loyihasini muhokamaga qo‘ydi.
Qayd etilishicha, Qurolli Kuchlar harbiy xizmatchilarining turar joyi bo‘yicha ijtimoiy muhofazasini kuchaytirish maqsadida prezidentining ayrim qarorlariga ilovaga muvofiq quyidagilarni nazarda tutuvchi o‘zgartirishlar kiritiladi:
- harbiy xizmatchilariga turar joyni ijaraga olganlik (ijarada turganlik) uchun har oylik pul kompensatsiyasi to‘lash miqdorini 50 foizga oshirish;
- harbiy xizmatchilarga va harbiy xizmatdan rezervga (isteʼfoga) bo‘shatilgan (chiqarilgan) fuqarolarga turar joy sotib olish (qurish) uchun ipoteka krediti olinishida ularning kalendar hisobdagi harbiy xizmat muddatiga muvofiq dastlabki badal miqdorini oshirish.
Iqtisodiyot va moliya vazirligi, Qurolli Kuchlar tarkibiga kiradigan vazirlik va idoralarning so‘rovnomasiga asosan harbiy xizmatchilariga turar joyni ijaraga olganlik (ijarada turganlik) uchun har oylik pul kompensatsiyasining oshirilgan to‘lovlari bo‘yicha xarajatlarni amalga oshirish uchun davlat budjetidan zarur mablag‘lar ajratsin, 2024-yildan boshlab zarur mablag‘larning davlat budjeti parametrlarida ko‘zda tutilishini taʼminlaydi.
Mudofaa vazirligi manfaatdor vazirlik va idoralar bilan birgalikda bir oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritadi.
Fevral oyida “O‘zbekiston Respublikasi Qurolli Kuchlari harbiy xizmatchilariga ipoteka krediti taqdim etish orqali uy-joy bilan ta’minlash tizimini takomillashtirish bo‘yicha qo‘shimcha chora-tadbirlar to‘g‘risida”gi Vazirlar Mahkamasi qarori qabul qilingandi. Unga ko‘ra, harbiy xizmatchilarga “ijara puli” ipoteka uylari topshirilgunga qadar beriladigan bo‘lgan edi.
Izoh (0)