O‘zbekiston mobil internet narxining arzonligi bo‘yicha 238 ta davlat ichida 22-o‘rinni egalladi. Bu haqda Cable xabar bermoqda.
O‘tgan yilda mamlakat 1 Gb uchun o‘rtacha 0,37 dollar narx bilan 15-o‘rinni egallagandi. O‘zbekistonda 1 Gb internet narxi o‘rtacha 0,30 dollar bo‘lib, MDH mamlakatlari orasida internet arzonligi bo‘yicha 2-o‘rinni egallaydi.
Markaziy Osiyo va MDHdagi eng arzon narx Qirg‘izistonda — 1 Gb uchun 0,17 dollar. Mamlakat o‘tgan yilgi darajasidan ikki pog‘onaga tushib, 8-o‘rinni egalladi.
Qozog‘iston esa 0,41 dollar ko‘rsatkich bilan 35-o‘rinni band etgan. Tojikistonda 1 Gb internet narxi o‘rtacha 1,65 dollar bo‘lib, u jahonda 142-o‘rinda turadi. Markaziy Osiyoda eng qimmat internet esa Turkmanistonda — 1 Gb uchun 11,42 dollar. Mamlakat dunyo bo‘yicha 231-o‘rinni egallagan.
Eng arzon mobil internet Isroilda — 1 Gb uchun 0,02 dollar. Keyingi o‘rinlarda Italiya (0,09 dollar), Fizi (0,09 dollar), San-Marino (0,10 dollar) va Kamboja (0,12 dollar) joy olgan.
Eng qimmat mobil internet esa Zimbabve (43,75 dollar), Folklend orollari (40,58 dollar) va Muqaddas Yelena orollariga (40,13 dollar) tegishli.
O‘zbekistonda internet tezligi
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
Respublika 2022-yilda dunyodagi simli internet tezligi bo‘yicha reytingda 155-o‘rinda bo‘lgan. 2023-yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. O‘zbekistondagi simli internet tezligi 21,67 Mbit/s ekani qayd etilgan.
Shuningdek, O‘zbekistonda 2023-yil mart oyidan boshlab mobil internet tezligi oshirilishi va mamlakat bo‘ylab 5G texnologiyasi joriy etilishi to‘g‘risida xabar berilgan edi.
Izoh (0)