Qozog‘iston prezidenti Qosim-Jo‘mart To‘qayev Birlashgan Millatlar Tashkiloti (BMT) hozirda yagona nufuzli “universal global tashkilot” bo‘lib qolayotganini aytdi, ammo uning fikricha, BMT Xavfsizlik kengashini isloh qilish zarur.
“Biz Xavfsizlik kengashini keng qamrovli isloh qilmasdan turib, mavjud muammolarni hal eta olmaymiz”, — dedi To‘qayev Ostona xalqaro forumining yalpi majlisida. U BMT Xavfsizlik Kengashi tarkibini unda “o‘rta darajadagi kuchlar” vakillarining ovozi eshitiladigan darajada o‘zgartirishni taklif qildi.
Uning fikricha, ayni damda “BMT tashkil topganidan beri ilk bor jahon tartibi asoslariga chindan putur yetmoqda”. Qosim-Jo‘mart To‘qayev jahondagi geosiyosiy vaziyat haqida gapirar ekan, “blok mafkurasi” qaytayotganini taʼkidladi.
“Bizni ajratgan sobiq ‘blok’ mafkurasi 30 yildan so‘ng qaytib kelganiga guvoh bo‘lmoqdamiz. Bo‘linish faqat geosiyosiy xususiyatga ega emas. Ularning iqtisodiy ta’siri ham bor. Iqtisodiy siyosatning o‘zi ochiqdan-ochiq qurol sifatida qo‘llanadi. Bu muxolifatga sanksiyalar va savdo urushlari, maqsadli qarz siyosati, moliyalashtirish manbalariga kirishni cheklash yoki ulardan ajratish va investitsiyalarni nazorat qilish kiradi. Bu omillar birgalikda so‘nggi o‘n yilliklardagi global tinchlik va farovonlik asosi bo‘lgan poydevorga: erkin savdo, global investitsiyalar, innovatsiyalar va adolatli raqobatga asta-sekin putur yetkazadi”, — dedi To‘qayev.
Qozog‘iston rahbarining so‘zlariga ko‘ra, oqibatda ishonchsizlik kuchayib bormoqda, bu esa taniqli xalqaro forumlar, mavjud asoslar, xavfsizlik rejimlari, yadro qurolini tarqatmaslik mexanizmlari faoliyatiga salbiy ta’sir ko‘rsatadi.
Izoh (0)