O‘zbekiston Tashqi ishlar vazirligi 31-may kuni Shimoliy Koreya tomonidan tashuvchi kosmik raketa uchirilganidan xavotir bildiradi. Bu haqda vazirlik matbuot kotibi o‘zining Facebook sahifasiga yozib qoldirdi.
Qayd etilishicha, ushbu holat Koreya yarim orolidagi keskinlikning yanada kuchayishiga olib keladi.
“BMT Xavfsizlik Kengashi rezolyutsiyalaridan kelib chiqadigan majburiyatlarga muvofiq, ommaviy qirg‘in qurollarining barcha turlarini sinovdan o‘tkazishdan bosh tortilishi tarafdorimiz.
O‘zbekiston tomoni bundan keyin ham umumiy farovonlik va taraqqiyot yo‘lida Koreya yarim orolida xavfsizlikni ta’minlash bo‘yicha faol qadamlarni qat’iy qo‘llab-quvvatlaydi”, — deyiladi xabarda.
31-may kuni ertalab Janubiy Koreya Birlashgan shtab boshliqlari qo‘mitasi Shimoliy Koreya janubga tomon raketa uchirganini ma’lum qilgandi. Shu munosabat bilan Seulda havo hujumidan ogohlantirish e’lon qilindi, Janubiy Koreya poytaxti aholisidan evakuatsiyaga tayyor turish va birinchi navbatda “bolalar va qariyalarni xavfsiz joylarga yetkazish” so‘ralgan. Biroz vaqt o‘tgach, mamlakat Ichki ishlar vazirligi shahar hokimiyati tomonidan yuborilgan ogohlantirish “noto‘g‘ri tashkil etilgan”ini bildirgan.
Avvalroq Shimoliy Koreya yaqin haftalarda sun’iy yo‘ldosh uchirishi haqida Yaponiyaga bildirish yuborgan edi. Pxenyan Tokioni sun’iy yo‘ldoshni 31-may—11-iyun oralig‘ida uchirish rejalaridan xabardor qilgan.
Izoh (0)