“Daryo” muxbirlari marhum aktyor Shuhrat Nuraliyev xonadonida bo‘lib, xotira ko‘rsatuv tayyorladi. Ijodkorning farzandlari nafaqat otalari vafot etganidan keyin, hayotlik chog‘ida ham uni sog‘inishgani va bir necha yil ayro yashashganini ma’lum qilishdi.
— Adam bilan ko‘p ham ko‘risholmasdik. Chunki biz oilaviy nizolar sabab buvimning uyida yashardik. Aslida adam bilan onam biror marta tortishishmagan, ular bir-birini tushunishardi. Avval adam ota uyida yashadi, ammo ko‘p o‘tmay alohida yashayotganlari haqida eshitdik. Adam hech qachon bizni yolg‘izlatib qo‘ymasdi. Onalarini ko‘rgani kelsak, adam ham ota uyiga kelardi. Yoshlikdagi qiyinchiliklarni gapirib, kuldirib o‘tirardi.
Turmushga chiqqanimdan keyin erkak kishiga oson emasligini anglab yetdim. Chunki oilaning tarqalib ketmasligi ko‘p jihatdan erkaklarga bog‘liq ekan. O‘sha paytda vaziyatni tushunmagandirman, ammo oilali bo‘lgach erkak kishi uchun onasi va ayolini birdek tushunish naqadar qiyin ekanligini anglayapman.
Adam arazlab bir necha yil ota uyiga ham kelmay qo‘ygan. Ammo shunda ham buvim va amakilarimni o‘ylab, ro‘zg‘orlik qilib taksidan berib yuborar ekan. Bir kuni qo‘ng‘iroq qilib, buvimning uyiga bormoqchi ekanligimizni aytdim. Adam noiloj rozi bo‘ldi. Buvimning uyiga borsak, adam bizdan avvalroq kelib, podyezdda kutib turgan ekan. O‘shanda hammamiz quchoqlashib yig‘laganmiz. Adam rahmatli “Bo‘ldi, nima bo‘lsa bo‘ldi. Endi birga yashaymiz”, degandi. Afsuski, oradan ko‘p o‘tmay ahvoli yomonlashdi, — deydi aktyorning to‘ng‘ich qizi Maftuna Nuraliyeva.
Marhum ijodkorning hamkasbi, aktrisa Vazira Yunusova esa Shuhrat Nuraliyevning ofisda yashagani va vafotidan avval aytgan so‘zlari haqida gapirdi.
— Shuhrat Nuraliyev oilasi bilan ajrashib ketgani haqida eshitgandim. Ofis olib, o‘sha yerda ham ijod qilardi, ham yashardi. U onasini juda yaxshi ko‘radigan, qalqon bo‘loladigan farzand edi. Oddiy misol, u ayoliga paypoq olmoqchi bo‘lsa ham, bozorga bizni olib borib, avval onasiga boshdan oyoq kiyim olib, keyin ayoliga kerak bo‘lgan narsani xarid qilardi.
“Men sendan oldin ketaman, opa”, degan gapni ko‘p aytardi. Hatto o‘limidan avval ham shu haqda gap ochganida “Sen mendan ancha yoshsan, o‘g‘lim yo‘q anbarimni o‘zing ko‘tarasan” deganida koyib bergandim. Shuhrat quvnoq, dardsiz insondek ko‘ringan bo‘lsa-da, ichida yutib yurganlari ko‘p ekan. U onasi, ayoli, farzandlari va ukalari haqida ko‘p o‘ylardi. Bolalarining to‘yini qilishni orzu qilardi, — deydi aktrisa Vazira Yunusova.
Eslatib o‘tamiz, Shuhrat Nuraliyev 1980-yilning 5-noyabr kuni Toshkent shahrida tavallud topgan. U sobiq Mannon Uyg‘ur nomidagi Toshkent davlat san’at institutini tamomlagan. Kino aktyorligidan tashqari, O‘zbek Milliy akademik drama teatrida ham faoliyat yuritgan. Vafotidan avval esa O‘zbekiston xalq artisti Yulduz Usmonovaning jamoasida rahbar va rejissor vazifasida ishlagan. Shuhrat Nuraliyev Nilufar Usmonovaning “Asraydi”, “Kel ikkimiz” kabi xit qo‘shiqlari muallifi hisoblanadi. Shuningdek, u Yulduz Usmonovaning bir necha qo‘shiqlariga kliplar suratga olgan.
Izoh (0)