Smetana, jo‘xori uni, xamirturush, avokado, tuxum — ayollar bu mahsulotlardan yuz terisi uchun niqoblar tayyorlashda foydalanadi, biroq bu borada zaytun yog‘idan yaxshiroq narsa yo‘q. Zaytun yog‘i yuz terisini namlantirishga, oziqlantirishga, sovuq ob-havodan himoya qilishga va yog‘li yuz terisini yaxshi holatga keltirishga yordam beradi. “Noviy ochag” nashri zaytun yog‘ining yuz terisiga foydali bo‘lgan jihatlari haqida ma’lumot berdi.
Nima sababdan zaytun yog‘i qaymoqqa qaraganda yaxshiroq?
Tibbiyot fanlari doktori va Buyuk Britaniyadagi Doctor4U umumiy amaliyot shifokori Diana Gall zaytun yog‘i ajoyib antioksidant bo‘lib, erta qarishni va oksidlovchi stress va quyosh ta’siridan kelib chiqqan teri shikastlanishining oldini olishini aytgan.
Zaytun yog‘i yuz terisiga qanday ta’sir qiladi?
“Yuz terisi salomatligi ko‘p jihatdan to‘g‘ri ovqatlanishga bog‘liq bo‘lsa-da, krem o‘rniga zaytun yog‘idan foydalanish ham ijobiy ta’sir ko‘rsatadi. Zaytun yog‘i A, D, E va K vitaminlariga boy bo‘lib, ularning har biri yuz terisiga o‘ziga xos tarzda ta’sir qiladi”, — deydi mutaxassis Diana Gall.
Bu borada eng muhimi vitamin E, u antioksidant bo‘lib, terini erkin radikallar ta’siridan himoya qiladi. Organizmdagi erkin radikallarning paydo bo‘lishi tabiiy jarayon, biroq ular juda ko‘p bo‘lmasligi kerak. Erkin radikallarning katta konsentratsiyasi onkologik kasalliklarni keltirib chiqarib, hujayralarga zarar yetkazishi mumkin.
Shuningdek, E vitaminining antibakterial xususiyatlari psoriaz yoki ekzema bilan yordam beradi.
Zaytun yog‘i bakteriyalarni yo‘q qiladi, teri infeksiyalarini davolashda yordam beradi. Zaytun yog‘i tarkibidagi A vitamini husnbuzarlarni keltirib chiqaradigan bakteriyalar bilan samarali kurashadi.
Kimlar yuz terisini namlashda zaytun yog‘idan foydalana olmaydi?
Yog‘li yuz terisiga ega bo‘lgan insonlar yuz terisini namlash uchun zaytun yog‘idan foydalanishlari mumkin — bu mahsulot past komedogen indeksga ega, ya’ni teshiklarni yopmaydi. Biroq bu namlantiruvchi vositadan nozik va juda quruq teriga ega ayollar foydalanmasligi kerak. Proven Skincare kompaniyasining ijrochi direktori Ming Chjaoning so‘zlariga ko‘ra, bunday yuz terisiga ega insonlar zaytun yog‘idan foydalansa, bu terining yanada ko‘proq zararlanishiga va yomonlashishiga olib kelishi mumkin.
Chjaoning so‘zlariga ko‘ra, yuz terisidagi quruqlikni yoki sezgirlikni faqat zaytun yog‘i bilan davolashga urinish befoyda. Bug‘doy, guruch, zaytun asosidagi yog‘lar majmuasidan foydalansa bo‘ladi. Ularni birgalikda qo‘llash bir vaqtning o‘zida teridagi tirnash xususiyatini tinchlantiradi va namlantiradi.
Zaytun yog‘idan qanday qilib to‘g‘ri foydalansa bo‘ladi?
Faqat yuqori sifatli organik zaytun yog‘ini tanlang. Uni lavanda, bodom va uzum moylari bilan aralashtiring. Bundan tashqari, zaytun yog‘iga E vitamini qo‘shishingiz mumkin, bu vosita yuz, soch va tirnoqlarga qo‘llanishi mumkin. Bitta muolaja uchun bir necha tomchi yetarli bo‘ladi. Birinchi navbatda, yog‘ni kaftlaringizga, so‘ngra uni yuz teringizga surting, qatlam yetarlicha yupqa bo‘lishi kerak, shunda teshiklar tiqilib qolmaydi, shu bilan birga, bu terining barcha kerakli narsalarni o‘ziga singdirishi va yaxshi ko‘rinishi uchun yetarli bo‘ladi.
Izoh (0)