30-mart kuni kechqurun Turkiya parlamenti Bosh assambleyasi Finlyandiyaning NATOga kirishi haqidagi protokolni ratifikatsiya qildi, deb yozmoqda “Anadolu”.
Bir necha kun oldin Finlyandiyaning NATOga kirishi Vengriya parlamenti tomonidan qo‘llab-quvvatlangan edi. Shundan so‘ng Turkiya Finlyandiyaning Shimoliy Atlantika alyansiga kirishini ma’qullashi kerak bo‘lgan so‘nggi NATO mamlakati bo‘lib qoldi.
Finlyandiya va Shvetsiya 2022-yilning may oyida, Rossiya Ukrainaga keng ko‘lamli bosqin boshlaganidan ko‘p o‘tmay, NATOga a’zo bo‘lish niyatini e’lon qildi. Mamlakatlar ittifoqqa qo‘shilish uchun birgalikda ariza topshirdi.
Fevral oyining boshiga kelib, Shimoliy Atlantika alyansiga yangi aʼzolarni qabul qilish to‘g‘risidagi protokol Vengriya va Turkiyadan tashqari NATOga aʼzo barcha davlatlar tomonidan ratifikatsiya qilindi. Ikkala davlat rasmiylari Finlyandiyaning alyansga kirishiga qarshi emasliklarini, biroq turli sabablarga ko‘ra Shvetsiyaning arizasini qo‘llab-quvvatlashga tayyor emasligini bildirdi.
Hozirda NATO tarkibiga 30 ta davlat kiradi. Yangi davlat alyansga uning arizasi NATOning barcha a’zolari ma’qullagan taqdirdagina qo‘shilishi mumkin.
Izoh (0)