Zelenskiy qurol-yarog‘ yetishmasligi sabab qarshi hujum boshlashning iloji yo‘qligini tan oldi

Ukraina o‘q-dori va qurol-yarog‘ yetishmasligi sababli hozircha qarshi hujumga o‘ta olmaydi, dedi mamlakat prezidenti Vladimir Zelenskiy Yomiuri Shimbun gazetasiga bergan intervyusida.

U mamlakat sharqidagi vaziyatni og‘ir deb baholadi. “Biz hamkorlarimizdan o‘q-dorilar kelishini kutmoqdamiz”, — dedi Zelenskiy. “(Qarshi hujumni) hali boshlay olmaymiz”, — deb qo‘shimcha qildi u. Ukraina rahbarining qayd etishicha, Kiyev uzoq kuta olmaydi.

Ukraina prezidenti Xitoyning urushni tugatish bo‘yicha takliflariga ham shubha bilan qaradi. Uning aytishicha, Kiyev Pekindan muzokaralar o‘tkazish bo‘yicha hech qanday so‘rov olmagan. U Kiyev diplomatik kanallar orqali Pekinga o‘z tinchlik formulasini yetkazgani va javob kutayotganini eslatdi.

Shu hafta Ukraina yetakchisi Ukraina va G‘arbning “qo‘shma harakatlardagi kechikishlar sabab yangi muvaffaqiyatlar kamroq” bo‘layotganiga e’tibor qaratdi. “Bu bizni tinchlikka erishishdan uzoqlashtiradi”, — dedi Zelenskiy. Uning tushuntirishicha, ayniqsa, G‘arb davlatlari uzoq masofaga uchuvchi raketalar va zamonaviy qiruvchi samolyotlar yetkazib berishni kechiktirmoqda va tinchlik formulasini muhokama qilish uchun Ukraina taklif qilgan sammitni tegishli darajada qo‘llab-quvvatlamayapti.

Zelenskiy 23-mart kuni Yevropa kengashi yig‘ilishi ishtirokchilariga murojaatida Rossiya—Ukraina urushining tugashini tezlashtirishga nima to‘sqinlik qilayotganini tushuntirib bergandi.

Zelenskiy bunga sabab sifatida G‘arb qiruvchilarining kechikishi hamda Rossiyaga qarshi yangi va kuchliroq sanksiyalar zaruratini sanadi.