Turkmaniston bu yil 1 mln tonnadan ortiq paxta yig‘ib olishni rejalashtirmoqda

Shu kunlarda Turkmanistonda mahalliy iqtisodiyot uchun strategik ekin — paxta xomashyosini ekish boshlandi, deb xabar berdi Turkmaniston Qishloq xo‘jaligi vazirligi vakili “Daryo”ga.

“Joriy yilda 580 ming gektar maydondan 1 million 250 ming tonna paxta yig‘ishtirib olish rejalashtirilgan”, — deyiladi xabarda.

An’anaga ko‘ra, ekin ekish marosimiga faxriy turkman oqsoqollari taklif qilinadi.

Dunyoning eng yirik paxta yetishtiruvchi o‘nta davlatidan biri bo‘lgan Turkmaniston 2023-yilda ekin maydonlarini 40 ming gektarga qisqartirdi. Mutaxassislarning ta’kidlashicha, bo‘shatilgan yer maydoni kartoshka va sabzavot yetishtirishni oshirishga yo‘naltiriladi.

Paxtaning katta qismi “Turkmaniston savdo belgisi”ga aylangan to‘qimachilik mahsulotlarini ishlab chiqarishga sarflanadi. Mahalliy uy matolari, sport kiyimlari va jinsi shimlar ba’zi G‘arb brendlari tomonidan buyurtma qilinmoqda va WalMart’ning butun dunyodagi do‘konlar tarmog‘i orqali tarqatilmoqda.

Turkmaniston davlat tovar birjasi auksionlarida ushbu mahsulotlarning narxi Liverpul paxta agentligining kotirovkalariga muvofiq belgilanadi.

Eziz Boyarov, Ashxobod