Saida Mirziyoyeva BMTda Orol dengizi fojiasining oqibatlari haqida nutq so‘zladi

Saida Mirziyoyeva 23-mart kuni BMTning Nyu-Yorkdagi bosh qarorgohida o‘tkazilgan Suv masalalari bo‘yicha konferensiyada nutq so‘zladi, deb xabar beradi O‘zA.

Qayd etilishicha, Mirziyoyeva BMT minbaridan Orol dengizi fojiasining oqibatlari, ularni yumshatish bo‘yicha O‘zbekiston tomonidan amalga oshirilayotgan keng ko‘lamli ishlar va bu boradagi xalqaro saʼy-harakatlarni birlashtirishda mamlakatning yetakchiligi xususida so‘z yuritgan.

Saida Mirziyoyeva Orolbo‘yidagi Mo‘ynoq ilgari yirik ishlab chiqarish quvvatlariga ega port shahar bo‘lgani, keyinchalik muvozanat buzilib, dengizning o‘lik qirg‘oqlari kemalar qabristoniga aylanganini taʼkidlab, qoraqalpoq elining atoqli shoiri Ibrohim Yusupov ijodidan dengizning ko‘z ochib yumguncha sahroga aylanishi tasvirlangan satrlarni o‘qib bergan.

“Orol dengizining inqirozi insoniyatning atrof-muhitga eʼtiborsizligi oqibatlari haqida dahshatli eslatmadir. Biroq g‘amxo‘r odamlarning saʼy-harakatlari tufayli u yana umid va yangilanish ramziga aylanmoqda”, — dedi Saida Mirziyoyeva.

So‘zining yakunida Saida Mirziyoyeva xalqaro hamjamiyatni global suv masalalari bilan chambarchas bog‘liq bo‘lgan Orol fojiasi oqibatlarini yumshatishda O‘zbekistonning saʼy-harakatlarini qo‘llab-quvvatlashni davom ettirishga chaqirgan.

Avvalroq Germaniya Orolbo‘yi mintaqasi uchun 700 ming dollar ajratishi to‘g‘risida xabar berilgandi.