Ijtimoiy tarmoqlarda FVV O‘zbekiston hududlarida 6 balldan 9 ballgacha zilzila kuzatilishi mumkin bo‘lgan 359 shahar ro‘yxatini eʼlon qilgani bilan bog‘liq xabarlar tarqalmoqda. Vazirlik mazkur xabarlar yolg‘on ekanini maʼlum qildi.
Unga ko‘ra, mamlakatda yana bir bor zilzila ro‘y berishi mumkinligi haqida yolg‘on maʼlumotlar tarqalib, uning manbasi sifatida Favqulodda vaziyatlar vazirligi rasmiy veb-sayti ko‘rsatilgan. 7-9 balli zilzila ro‘y berishi mumkin bo‘lgan hududlar ro‘yxati FVV tomonidan eʼlon qilinmagan.
“Aholimizni sarosimaga tushmaslikka va feyk xabarlarga ishonmaslikka chaqirib qolamiz. Bugungi kunda zilzilaning vaqti va joyini aniq belgilab beruvchi texnologiya yo‘qligini eslatib o‘tamiz”, deyiladi vazirlik xabarida.
Kuni kecha O‘zbekistonda yaqin kunlarda yana zilzila sodir bo‘lishi haqida turli xabarlar tarqalgandi. Favqulodda vaziyatlar vazirligi holatga munosabat bildirib, bugungi kunda dunyoning hech bir davlatida zilzila sodir bo‘ladigan sana va hatto taxminiy vaqtni bashorat qila oladigan texnologiyalar mavjud emasligini, O‘zbekiston seysmik faol zonada joylashgani sababli baʼzida yer silkinishlari sodir bo‘lishi va har doim shunday bo‘lganini bildirgandi.
Izoh (0)