Avstraliyaning g‘arbiy sohilida joylashgan Pert shahrida 16 yoshli qiz akula hujumidan so‘ng vafot etdi, deb xabar bermoqda 9News telekanali.
OAV ma’lumotlariga ko‘ra, qiz Suon daryosi bo‘ylab suv chang‘isida uchayotgandi, so‘ng delfinlar bilan birga suzish uchun suvga sakragan. Shu payt unga akula hujum qilgan. Voqeaga guvoh bo‘lgan shahar aholisi jabrlanuvchini suvdan olib chiqib, qutqaruvchilarni chaqirgan. Biroq og‘ir tan jarohatlari tufayli qiz shifokorlar yetib kelguniga qadar voqea joyida vafot etgan.
G‘arbiy Avstraliya shtat politsiyasi ma’lumotlariga ko‘ra, bu voqea 100 yildan ortiq vaqt ichida Suon daryosida birinchi halokatli akula hujumi bo‘ldi. Bu yerda oxirgi marta 1923-yil yanvar oyida 13 yoshli bola shunday hujumdan vafot etgandi.
Politsiya fikricha, qizga yirtqich buqa-akula hujum qilgan, u to‘mtoq akula deb ham ataladi. U o‘ziga xos tajovuzkorligi bilan ajralib turadi va o‘ziga yoqqan o‘ljaga yashin tezligida hujum qila oladi. Ushbu turdagi akulalar keng diapozondagi suv sho‘rlanishiga chiday oladi va okeanning qirg'oqqa yaqin qismida yashaydi, ko‘pincha chuchuk suvlarga kiradi, daryolar bo‘ylab uzoq masofalarga suzadi.
Yanvar oyi oxirida Avstraliyada sakkiz yoshli bola dengizda baliq ovlayotganida akula hujumiga uchragandi. Bola omon qolgan.
Izoh (0)