O‘zbekiston yo‘llarida xavfsizlikni ta’minlashda harakat ishtirokchilari fikri inobatga olinishi kutilmoqda

Oliy Majlis Qonunchilik palatasining 31-yanvardagi majlisida “Yo‘l harakati to‘g‘risida”gi qonun loyihasi deputatlar tomonidan qabul qilindi.

Quyi palata matbuot xizmatining xabar qilishicha, ushbu qonun loyihasida bir qator yangiliklar ko‘zda tutilgan. Majlisda hujjatdagi asosiy tushunchalar zamon talablari, huquqni qo‘llash amaliyotidan kelib chiqib qayta ko‘rib chiqildi va tahrir qilindi.

Yo‘l harakati sohasidagi asosiy prinsiplar soha amaliyotidan kelib chiqib belgilandi. Qonuniylik, tizimlilik, ilmiylik, fuqarolar hayoti va sog‘lig‘i muhofaza qilinishining ustuvorligi, ekologik xavfsizlikning va atrof-muhit muhofaza qilinishining ustuvorligi, mahalliy aholining va yo‘l harakati qatnashchilarining fikrini hisobga olish prinsiplari shular jumlasidan.

Xalq demokratik partiyasi fraksiyasining 30-yanvarda o‘tkazilgan yig‘ilishida qayd etilishicha, qonun loyihasida yoʻl harakati xavfsizligini taʼminlash sohasidagi maxsus vakolatli davlat organlar ham qayta koʻrib chiqilgan boʻlib, Ichki ishlar vazirligi davlat yoʻl harakati xavfsizligining vakolatlari kengaytirilmoqda.

Deputatlarning aytishicha, ushbu qonun loyihasi huquqni qo‘llash amaliyotida paydo bo‘layotgan tushunmovchiliklarni bartaraf etish barobarida, yo‘l egalarining, yo‘l harakati qatnashchilarining huquqlari va majburiyatlarini qonun bilan mustahkamlashga xizmat qiladi.

Majlisda qonun loyihasi deputatlar tomonidan qabul qilindi.