O‘zbekistonda 2023-yilda yettita elektr stansiya ishga tushiriladi

O‘zbekistonda 2023-yil yakuniga qadar 7 ta elektr stansiya ishga tushirilishi rejalashtirilgan. 

Energetika vazirligi matbuot xizmati ma’lumotiga ko‘ra, bular umumiy quvvati 2910,6 MVt bo‘lgan bitta IES, bitta shamol, uchta quyosh va ikkita GESdir. 

Xususan:

• Sirdaryo viloyatining Shirin shahri va Boyovut tumanlari hududida quvvati 1500 MVt bo‘lgan zamonaviy issiqlik elektr stansiyasi;
• Navoiy viloyatining Tomdi tumanida quvvati 500 MVt bo‘lgan shamol elektr stansiyasi;
• Surxondaryo viloyatining Sherobod tumanida quvvati 457 MVt bo‘lgan quyosh fotoelektr stansiyasi;
• Samarqand viloyatining Kattaqo‘rg‘on tumanida quvvati 220 MVt bo‘lgan quyosh fotoelektr stansiyasi;
• Jizzax viloyatining G‘allaorol tumanida quvvati 220 MVt bo‘lgan quyosh fotoelektr stansiyalari ishga tushirilishi (yagona elektr tarmog‘iga ulanishi) rejalashtirilgan.

Ahamiyatlisi, ushbu elektr stansiyalar xorijiy kompaniyalar tomonidan 100 foiz to‘g‘ridan-to‘g‘ri investitsiyalar hisobiga amalga oshirilmoqda.

Bundan tashqari, Samarqand viloyatida umumiy quvvati 13,6 MVt bo‘lgan 2 ta gidroelektr stansiya ishga tushiriladi. Shuningdek, To‘palang GES modernizatsiya qilinadi va uning quvvati amaldagi 30 MVtdan 175 MVtga (+145) oshiriladi.

Ma’lumot uchun, 2022-yilda umumiy quvvati 1474 MVt bo‘lgan 7 ta yangi elektr stansiya ishga tushirildi.