Navbahor Imomova O‘zbekistondagi mediamuhit korrupsiyalashganini aytdi

“Mening yurtim” telekanalida 27-yanvar kuni efirga uzatilgan “Markaziy studiya” ko‘rsatuvida xalqaro jurnalist Navbahor Imomova O‘zbekiston mediamuhitidagi korrupsiya haqida gapirdi.

Uning ta’kidlashicha, OAVda e’lon qilinayotgan pul evaziga tayyorlangan ayrim materiallar auditoriyaga bildirilmaydi. Aslida, o‘quvchilar bu haqda ogohlantirilishi kerak. Ayrim hollarda bu rasman, tashkilotlarga pul o‘tkazish orqali yoki norasman, cho‘ntakka pul solib qo‘yish evaziga amalga oshiriladi.

“Mediada korrupsiyaning yana bir shakli bu biz sizning PR bilan ishlaymiz, ya’ni obro‘-nufuzni oshirib beramiz, deb ham pul olishadi. Reklamadan yoki PR’dan daromad qilish aybli emas. Bu normal holat. Meni jurnalist sifatida bezovta qiladigan jihati, bu reklamaning sir tutilayotganidir. Yoki muayyan tomonlar uchun xizmat ko‘rsatish shaklidir.

Odatda jurnalist, blogerlar aytishadiki, bizga tirikchilik kerak. Biror-bir murojaatni yoritadigan bo‘lsak, murojaatchi tomon bizga xarajatlarni qoplashi kerak, deyishadi. To‘g‘ri, buni qaysidir darajada qabul qilish mumkin, lekin auditoriyadan yashirilmasligi kerak.

Birinchidan, qachondir normalarni belgilashni boshlash kerak. O‘zbekistonda mard va jasoratli ommaviy axborot vositalari sekin-sekin maydonga chiqishi kerak va ular hozir ham bor. Bunday nashrlar juda ham oz hamda boshqalarning bosimiga qarshi kurashish bilan band. Ular ham reklama, tijoriy kontent va axborot uchun chegaralar chizib qo‘yishi kerak. 

Korrupsiya hech bir payt bir tomonning ishi bo‘lmaydi. Oladigan va beradigan tomon bor. Jurnalistlar bu vaziyatda ishtirokchi bo‘lib qoladi. Siz korrupsiyada ishtirokchi ekansiz, demak, korrupsiyani yorita olmaysiz”, — deydi jurnalist.