Jarohat olgan Neymarning qachon safga qaytishi ma’lum bo‘ldi

Braziliya terma jamoasi hujumchisi Neymar JCH—2022 1-turi doirasida Serbiyaga qarshi kechgan bahsda (2:0) jarohat olgandi.

Futbolchining o‘ng oyog‘idagi boldir suyagi bilan tovon suyagini biriktiruvchi bo‘g‘inda muammo kelib chiqqan va shish kuzatilgandi.

Braziliya terma jamoasi shifokorlari futbolchining tiklanish jarayoniga optimistik qaramoqda. Neymar og‘riqlarsiz harakatlanmoqda, to‘pig‘idagi shish ham qaytgan. Biroq tibbiy shtab futbolchiga ko‘proq dam berish istagida. Uning maydonga qaytishi jamoaning natijalariga bog‘liq bo‘ladi.

Futbolchi Shveysariyaga qarshi bahsni o‘tkazib yuboradi. Shuningdek, 2-tur bahsida Danilo ham qatnasha olmaydi. Agar Braziliya bu o‘yinda g‘alaba qozonib, pley-offga yo‘l oladigan bo‘lsa, u holda jarohat olgan ikki futbolchi Kamerunga qarshi o‘yinni ham o‘tkazib yuboradi. Ularni 1/8 finalga qadar asrash ustuvor vazifa bo‘lib turibdi.

Agar “pentakampionlar” Shveysariyaga qarshi o‘yinda muvaffaqiyatli natija qayd eta olmasa, u holda Neymar Kamerunga qarshi bahsda maydonga tushadi.