O‘zbekiston bank assotsiatsiyasining 15-banklararo spartakiadasi doirasida mini-futbol bo‘yicha musobaqalar bo‘lib o‘tdi. Deyarli bir oy davomida 20 dan ziyod tijoriy bank terma jamoalari ushbu sport turida birinchilikni qo‘lga kiritish huquqi uchun kurashishdi va nihoyat, g‘oliblik shohsupasidan InfinBANK joy oldi.
G‘alabaga erishish oson bo‘lmadi – ushbu chempionat o‘tkazilayotganidan buyon bank ilk marotaba mana shunday yutuqni qo‘lga kiritmoqda. Terma jamoa a’zolari orasida g‘alaba uchun 10 yildan buyon harakat qilayotganlar bor. Aytish joizki, jamoaga Zangiota tumani, Andijon, Navoiy, Buxoro shaharlari, shahar boshqaruvi, operativ boshqaruv kabi turli filiallardan mutaxassislar jalb etildi. Musobaqaning adolatli va teng shartlarini ta’minlash uchun spartakiada tashkilotchilari qat’iy talab qo‘yishdi: jamoada hech qanday professional o‘yinchilar bo‘lmasligi, jamoa a’zosi sifatida esa ishga 2021-yil 31-dekabrga qadar qabul qilingan xodimlar qatnashishi belgilandi.
Bu sharoitda o‘yinchilar faqat o‘z kuchiga ishonishi mumkinligi kundek ravshan. Butun bo‘sh vaqti va barcha dam olish kunlarini InfinBANK mashg‘ulotlarda o‘tkazdi. Bir joyda o‘tirib, intellektual mehnat bilan shug‘ullanadigan odamlar, og‘ir ish kunidan so‘ng qat’iy ofis dress-kodini sport kiyimiga almashtirib, jamoa kapitani Sherzod Janizakov boshchiligida futbol maydoniga otlanishar edi. Jarayonni buning uchun maxsus taklif qilingan futbolchi Aziz Mamatov — Ista Futsal League 2022’ning eng yaxshi o‘yinchisi boshqardi.
“InfinBANK jamoasini oldin ham futbol matchlarida ko‘rganman, ayrim o‘yinchilar bilan shaxsan tanish edik. Shuning uchun ular bilan murabbiy sifatida ishlashni taklif qilishganda, hech ikkilanmay rozi bo‘ldim. Mashg‘ulotlarni mayda boshladik va ularning har birida bolalar yaxshi harakat qilishdi. Yagona qiyinchilik barchani o‘z vaqtida bir joyga to‘plash edi, chunki ish bank xodimlarida har qanday vaziyatda birinchi o‘rinda turadi. O‘z g‘alabasi bilan ular sifatli tayyorgarlik va uyushgan jamoa o‘yini qanchalik muhim ekanligini isbotlashdi, men esa o‘z navbatida, InfinBANK’ga shogirdlarimning intizomi, olingan tajriba va erishilgan g‘alabaga hissa qo‘shish imkoniyati uchun minnatdorlik bildiraman”, — deb tabassum bilan eslaydi Aziz Mamatov.
Guruh bosqichida InfinBANK raqiblar ustidan ishonchli g‘alabalarga erishdi. Faqat bir marotaba o‘yin durang bilan yakunlandi — bu Orient Finans Bank jamoasi bilan uchrashuvda yuz berdi. Vaziyat taqozosi bilan xuddi shu terma jamoalar finalda ham g‘alaba uchun kurashdi, ammo bu gal InfinBANK yetakchiligini isbotladi – asosiy o‘yin infinchilar foydasiga 3:0 hisobi bilan yakun topdi.
“InfinBANK korporativ madaniyatida sport an’analari alohida o‘rin tutadi. Bank o‘z xodimlarining havaskorlar futzal ligasida ishtirok etishini rag‘batlantirish bilan birga, turli sport tashabbuslari va tashkilotlariga ham homiylik qiladi. O‘tgan yili InfinBANK O‘zbekiston polo federatsiyasiga va ilk marta nogiron-amputantlar futbolini rivojlantirish markazi ‘Matonat futbol’ga homiylik qildi. Bu yil homiylik tobora kengayib bormoqda. Bo‘lib o‘tgan chempionatdagi g‘alabaga kelsak, buni oson deb bo‘lmaydi. Bizda munosib raqiblar bor edi. Biroq yigitlar g‘alaba qozonish va uni InfinBANK’ning 15 yilligiga bag‘ishlash uchun bor imkoniyatlarini ishga solishdi”, — deydi jamoa sardori Sherzod Janizakov.
Reklama huquqi asosida.
Izoh (0)