“Hayotimni saqlab qolish deyarli imkonsiz edi”. Jigar saratoniga chalingan Ra’no Shodiyeva Turkiyada davolanishi uchun moddiy yordam bergan Jahongir Ortiqxo‘jayevga minnatdorlik bildirdi (foto)

O‘zbekistonda xizmat ko‘rsatgan artist Ra’no Shodiyeva Instagram’dagi sahifasi orqali muxlislari bilan muloqot qilib, ilk marta jigar saratoniga chalingani hamda Turkiyada davolanishi uchun Toshkent shahar hokimi Jahongir Ortiqxo‘jayev unga moddiy yordam bergani haqida so‘zlab berdi.

“Shifokorim menga qarab shok holatiga tushdi. U mendan spirtli ichimlik ichasanmi, chekasanmi, fastfud iste’mol qilasanmi, gazlangan ichimliklar ichasanmi, deb so‘radi. Yo‘q, men umuman ichmayman, chekmayman, 10 yildirki gazlangan ichimliklar va fastfud iste’mol qilmayman, deb javob berdim. U yana mendan sariq kasal bo‘lganmisan, jigar sirroziga chalinganmisan, deb so‘radi. Yo‘q, men bunday kasalliklarni boshdan o‘tkazmaganman, deb javob berdim. Keyin bilsam, mendagi kasallik aynan shu sabablarga bog‘liq ekan. Xullas, menda juda kam foiz ayollar chalinadigan jigar saratoni aniqlandi”, — deya hikoya qiladi aktrisa.

Shuningdek, aktrisa Moskvaga ish bilan borganida tobi qochgani, shu sabab shifokorga uchragani haqida ham so‘zlab berdi.

“Odatda, jigar bilan bog‘liq kasalliklar so‘nggi nuqtada o‘z belgilarini namoyon qiladi. Agar kasalligim tarixini bilishga qiziqsangiz, buni aytib beraman. Men onam va kasbdoshlarim bilan birga Moskvada o‘tkaziladigan konferensiyaga yo‘l oldik. U yerda eshitish nuqsoni bo‘lgan insonlarga ko‘mak berish maqsadida yangi loyihalarga qo‘l urishimiz kerak edi. Mutaxassislar bilan fikr almashib, keyingi  besh yildagi rejalarimni tuzib qo‘ygandim. Afsuski, samolyotga o‘tirayotgan vaqtda birdan tobim qochdi. Balki bunga og‘ir chamadon ko‘targanim sabab bo‘lgandir.

Tez yordam chaqirtirib, og‘riqsizlantirishga harakat qilishdi. Shu bois samolyotning parvozi biroz kechikdi, hatto mensiz uchmoqchi ham bo‘lishdi. Javobgarlikni o‘z bo‘ynimga olaman, deganimdan keyin parvoz qilishimga ruxsat berishdi. Ammo juda qiynaldim. Ertasi kuni Toshkentdagi klinikalarning biriga borib tekshiruvdan o‘tgach,  jigarimning 50 foizi  kasallanganini aytishdi. Menga jigar saratoni degan tashxis qo‘yishdi. Men shok holatiga tushib qoldim. Chunki shu yoshga qadar biror marta jigarim og‘rimagan, bu  kutilmagan ‘yangilik’ bo‘ldi. Yaqinlarim ancha yillardan buyon ko‘cha ovqatlarini iste’mol qilmasligimni va gazli ichimliklar iste’mol qilmasligimni yaxshi bilishardi. Sog‘lig‘imga e’tiborli bo‘lsam-da, bu xastalikka chalinganim meni hayratlantirdi”, — deydi aktrisa.

Ra’no Shodiyevaning aytishicha, Turkiyadagi shifokorlar ham aktrisaga hammasi Allohdan ekanligini aytgan.

“Shundan so‘ng ishonchli shifokor izlab, Turkiyaga kelishga qaror qildik. Bundan hech qachon afsuslanmayman, o‘sha chog‘da meni qutqarish variantlari juda kam edi. Men 11 soat jarrohlik stolida yotdim va Yaratganning inoyati bilan hayotga qaytdim. Aslida, bu operatsiya 6 soat bo‘lishi kerak edi. Ammo ba’zi sabablarga ko‘ra 11 soatga cho‘zildi. Shifokorim natijadan juda xursand bo‘ldi. Chunki ahvolim yaxshi emasligini ko‘rib, yarani qaytadan yopib qo‘yishi ham mumkin edi. Yaratgan menga yana bir bor yashash imkonini berganidan juda xursandman”, — deydi aktrisa.

Ra’no Shodiyeva poytaxt hokimi Jahongir Ortiqxo‘jayev uning davolanishi uchun moddiy yordam berganini aytib, unga minnatdorlik bildirdi.

“Alloh menga bir sinov berdi. Shu sinovdan chiroyli o‘tishga harakat qildim. Yaqinda Toshkent shahar hokimi Jahongir Ortiqxo‘jayev Obidovich savob qilganingizni hech kimga gapirishingiz shart emas, dedilar. To‘g‘ri, o‘ng qo‘ling berayotgan narsani chap qo‘ling bilishi shart emas, deyishadi. Ammo men jim turolmadim. Musofir yurtda davolanayotganimni eshitib, juda ko‘p insonlar yordam qo‘lini cho‘zishdi. Ular orasida qarindoshlarim, do‘stlarim va hamkasblarim ham bor. Jahongir Obidovich birinchilardan bo‘lib turmush o‘rtog‘imga qo‘ng‘iroq qilib, hol-ahvolimni so‘rab, musofirchilikda hech kimdan kam qilmasdan barcha sharoitlarni yaratib berdilar. Buning uchun o‘zim va oilamiz nomidan minnatdorlik bildiraman. Bu to‘g‘rida gapirish qanchalik qiyin bo‘lmasin, siz chet eldan kelayotgan o‘zbek insonlariga yordam berganingiz haqida ko‘p marta eshitganman. Buning uchun sizga kattakon rahmat aytaman. Sog‘lig‘imdan qayg‘urib, yordam qo‘lini cho‘zgan boshqa insonlarga ham minnatdorlik bildiraman”, — deydi aktrisa.

Aktrisa Ra’no Shodiyeva 2022-yilning yanvar oyida “Daryo” internet-nashriga bergan intervyusida og‘ir jarrohlik amaliyotidan so‘ng Turkiyada davolanayotganini ma’lum qilgandi. Oradan bir necha kun o‘tib, Instagram orqali jiddiy jigar xastaligi bilan og‘riganini oshkor etgandi.

“Jigarimning 60 foizini olib tashlashdi va sog‘lomini qoldirishdi. Jigar — bu o‘sadigan a’zo. Xudo xohlasa, olib tashlangan o‘sha foizi bir yil davomida yana ham o‘sib, joyiga tushadi. Oson amaliyot bo‘lmadi, juda qiyin, mashaqqatli. Jigarning o‘zi 300 ta funksiyani bajaradi. Unda qon tomirlari ko‘p. Shuning hammasini joy-joyiga tikib, amalga oshirish kerak”, — degandi Ra’no Shodiyeva.

Toshkent shahri hokimi Jahongir Ortiqxo‘jayev 16-fevral kuni o‘tkazilgan matbuot anjumanida homiylik asosida qilgan yordamini birovga ko‘z-ko‘z qilmasligini bildirgandi.

“3,5 yil ishlagan bo‘lsam davlatning bir so‘m puliga xiyonat qilmadim. Oldimdan qo‘shgan bo‘lsam qo‘shdim, lekin bir so‘miga xiyonat qilmadim. Shahar hokimi bo‘lishimdan avval 35 ta mashinam bor edi. Judayam mashinalarni yaxshi ko‘raman. Hozir esa oltita qoldi. Yaqinda yana bitta mashinamni auksionga qo‘yaman, uning puliga esa yuragida nuqsoni bor bolalarni operatsiya qildiramiz. Agar bular gunoh bo‘lsa roziman, agar bu pulni ishlatma shunga desangiz ham roziman. Lekin mening aybim — qilgan ishlarni aytib turishi kerak ekan inson. Aytmaganim — gunoh. Sergelidan uyi yo‘q insonlarga 400 ta kvartira hadya qilishgan. Shularni aytsam bo‘larkan, aytmaganman. Bugun afsuslanyapman”, — degandi hokim.