Yevropa komissiyasi Ukrainaga 1,2 milliard yevro miqdorida makromoliyaviy yordam ko‘rsatish yuzasidan taklifni ma’qulladi. Bu haqda Ukraina Moliya vazirligiga tayanib, “Interfaks” xabar bergan.
“600 million yevro miqdoridagi birinchi transh kelishuvlar kuchga kirgan zahoti o‘tkazib beriladi. Ikkinchi xuddi shunday miqdordagi transh o‘tkazmasi jarayonga qarab, ya’ni Ukraina tomonlar o‘rtasidagi kelishuvga muvofiq qisqa muddatda ko‘radigan chora-tadbirlar, tuzilmaviy islohotlariga bog‘liq holda ajratiladi”, – deyiladi Ukraina Moliya vazirligi ma’lumotida.
Vazirlik Yevrokomissiyaning qarori qo‘shimchasiga YeI kengashi va Yevroparlament tomonidan qo‘llab-quvvatlanishi zarurligi, shundan keyin Ukraina bilan anglashuv memorandumi hamda imtiyozli ajratma mablag‘larini taqdim etish bo‘yicha kredit kelishuvi imzolanishini qayd etgan.
Moliya vazirligi makromoliyaviy yordam Ukrainaga geosiyosiy noaniqlik hamda uning iqtisodiy jarayonlarga ta’siri kuchli bo‘lgan ayni sharoitda makroiqtisodiy va moliyaviy barqarorlikni qo‘llab-quvvatlash maqsadida ajratilayotganini bildirgan.
2014-yildan beri Yevropa ittifoqi Ukrainaga makromoliyaviy yordamning beshta dasturi doirasida 5 milliard yevrodan ko‘proq mablag‘ ajratgan. Bundan tashqari, Yevrokomissiya yaqin orada mamlakatdagi asosiy va uzoq kelajakni ko‘zlab amalga oshiriladigan islohotlar, jumladan, qonun ustuvorligini ta’minlash, energetikani rivojlantirish hamda korrupsiya qarshi kurash uchun keng miqyosli makromoliyaviy yordam ajratish bo‘yicha ishni tashkil qilishni rejalashtirgan.
Avval yanvar boshida AQSh administratsiyasi Ukrainaga qo‘shimcha 200 million dollarlik harbiy yordam ko‘rsatishni 2021-yil dekabrida ma’qullagani, 2022-yil 1-fevralda esa AQShdan yana 84 tonna harbiy yordam Ukrainaga yetkazib berilgani haqida xabar qilingan. Shuningdek, shu kuni Ukrainada Oliy Rada majlisi chog‘ida turli fraksiyalardan bir qancha deputatlari AQSh, Britaniya va Kanada bayroqlari bilan parlament minbariga chiqib, Ukrainani qo‘llab-quvvatlagani uchun mazkur mamlakatlarga ingliz tilida minnatdorlik bildira boshlagan paytda Oliy Rada spikeri ulardan ukrain tilida gapirishni talab qilgan.
AQSh 2021-yilda Ukrainaga jami 650 million dollarlik harbiy yordam ko‘rsatgan. Mamlakat 2014-yildan buyon AQShdan umumiy qiymati 2,7 milliard dollarga teng yordam olgan.
Izoh (0)